Omupresidende Hage Geingob okwa tsakanene mEtiyali naalandulwa ye, Hifikepunye Pohamba naSam Nujoma, pethimbo kwa tulwa miilonga elelo lyoPresident’s Advisory Council.
Elelo ndyoka otali ka kwatela mo aapilima minista nale pamwe naapeha yawo naGeingob okwa popi kutya elelo ndyoka olya simana mokuya moonkundathana nokutsikila nokukalekapo omilandu dhepangelo.
Elelo ndyoka otali ka kala nokutsakanena lwaali momvula.
Geingob okwa holola kutya omutumba ngoka gwa ningwa mEtiyali oguli ondjokonona na okwa ti otali ulike ongushu yaAfrika omupe moka aaleli taya hogololwa nuuna ya manitha iikako yawo ohaya kala miilongo yawo.
“MuAfrika omupe aaleli yetu mboka yeli miipundi yevululuko oya simanekwa onga oohe yoshigwana. Shoka osho tatu ningi mpaka na otatu mu ulikile oohe yoshigwana shaNamibia.”
Omupresidende okwa popi kutya esimaneko lyaaleli nale oli li omukalondjiigilile muAfrika naNamibia ota gandja oshiholelwa oshiwanawa kuAfrika.
“Omolwaashoka tuli mpaka nena, sho omupresidende gwotango, omutiyali nomutitatu yeli mondunda yimwe. MuNamibia ondjokonona otayi tsikile, ondjokonona yombili nonkalonawa.”
Okwa popi kutya aaleli nale, Nujoma naPohamba otaya tsikile nokusimanekwa sho ya eta ombili moshilongo, edhiminathanepo negameno oshowo onkalonawa.
ELVIS MURARANGANDA