Natango onga oshitopolwa shomahwahwameko taga ningwa kOpolisi yoshilando opo ku lundululwe omaihumbato gonayi gaahingi niiponga, aahingi ayehe mboka haya humbata oshigwana otaya ka ningilwa omakonaakono nootutsa omanga inaya pewa omikanda dhoka taya ka pumbwa nokuningwa oshitopolwa shopoloyeka ndjoka ya nuninwa okulundulula omaihumbato gaahingi.
Omukomeho gwopolisi yaVenduka, Abraham Kanime okwa lombwele oNamibian Sun kutya Oshikondo shIilonga nOmalweendo otashi tala komilandu dhoka nelelo lyoshilando okwa tegelelwa li ka tule miilonga omulandu ngoka omupe okuya metata lyotango lyomvula yonuumvo.
Kanime okwa yelitha kutya uuna omilandu dhoka dha tulwa miilonga, aahingi yootaxi nenge mboka haya gandja omayakulo gomalweendo koshigwana otaya ka ningilwa omakonaakono gokuhinga omanga inaya pewa omikanda dhoka taya ka pumbwa.
Kanima okwa popi kutya omiyalu dhiiponga yomoondjila mwa kwatelwa iiponga ayihe mbyoka ya etithwa kaahingi yootaxi nenge kaahingi yopaumwene otadhi ulike kutya iiponga oya eithwa konkalo yomaihumbato guuhasha.
Okwa yelitha kutya omulandu ngoka omupe ogwa nuninwa okutala unene kaahingi mboka haya hingi yaahena ko nasha oshowo mboka taya endulula omapuko nomageelo giifuta nenge oolisensa tadhi kuthwa ko otaga ka pewa aahingi mboka taya ka monika kutya itaya ihumbata nawa naahingi otaya ka ningilwa woo omakonaakono gokuhinga.
Kanime okwa yelitha kutya otaya ka tsakanene mbala naahingi yotaxi opo ya tule miilonga oonkundathana dhomaiyuvo gopolisi kombinga yaagandji yomakwatho gomalweendo koshigwana.
Omupresidende namushanga-ndjai gwoNamibia Transport and Taxi Union (NTTU), Werner Januarie okwa popi kutya ehangano ngawo otali ka tinda omulandu ngoka omupe tagu ithanwa point demerit system.
Okwa gwedhako kutya ehangano otali ka kunkilila iilyo yalyo opo yi tinde omulandu ngoka.
Januarie okwa popi kutya egandjo lyombedhi pehala nali tale unene kekwatathann lyooyene yootaxi naaniilonga yawo mboka yeli aahingi yootaxi.
"Aahingi yootaxi kaye na ookondalaka dhiilonga nooyene yootaxi omathimbo gamwe ohaya pula iinima yilwe yaaheli mondjila naashoka osho hashi etitha aahingi ya hinge nayi pomathimbo gamwe," Januarie ta ti
Januarie okwa popi kutya omutumba ngoka tagu ka ningwa niikundaneki ngula(ohela) otagu ka tala komaiyuvo gaahingi yootaxi kombinga yomulandu ngoka gwopoint demerit system kwa gwedhwa iikumungu yonkalo yiilonga.
"Ngele otatu tala komulandu ngoka gwopoint demerit system nena natu tale woo kiikimungu ya taalela onkalo yiilonga yaahingi yotaxi," Januarie ta ti.
Kanime okwa popi kutya NTTU oku na omaiyuvo ge ihe okwa tsu omuthindo kutya oshi li oshinakugwanithwa she opo a kalekepo egameno lyomoondjila muuwananwa woshigwana.
Omiyalu dhelelo lyaVenduka odha ulike kutya iiponga yomoondjila oyindji moshilando mbyoka tayi etitha omaso, nomalemaneko otayi etithwa kokuhinga nuuhasha.
Kanime okwa popi kutya aahingi ihaya longwa okuhinga ihe ohaya longwa owala okwiinyengitha iihauto.
Kanime okwa koleke kutya okwa gandjwa omikandatulo miipandeko kaahingi yootaxi moshilando ya thika po-17 814 oshowo kaahingi yopaumwene, 46 653.
Kanima okwa popi kutya konyala iiponga oyindji ohayi holoka moshilando momahala ngaashi ocentral business district (CBD), western bypass, southern industrial oshowo Windhoek West noWindhoek North.
Omahwahwameko ngoka otaga ka gandja woo elongo kombinga yegameno lyomoondjila kaahingi nokutula miilonga omilandu omipe dhootutsa dhaahingi.
Okuza muJanuari opolisi yoshilando oya lopotelwa iiponga yomoondjila ya thika po-859 ya shuna pevi niiponga 98 okuyele nethimbo lya faathana omvula ya piti.
Pethimbo lya faathana natango okwa lopotwa omayehameko ga thika po245 oshowo omaso ga4.
Iipotha yokuhinga aantu ya longitha iikolitha ya thika po-76 oya lopotwa omanga iipotha yilwe 86 ya lopotwa moka mwa kwatelwa aayendi yokolupadhi, aahingi yoombasikela oshowo uupakapaka.
JANA-MARI SMITH