Omupresidende Hage Geingob okwa gandja iitsa 6.5 yomiitsa 10 kiikundaneki yomoshilongo sha landula omutumba ngoka a ningi naadhindi yiikundaneki mEgumbo lyEpangelo mOmandaha.
“Otamu longo iilonga yeni. Onda kala aluhe nokupopya kutya oshilonga shimwe shoka itandi vulu okulonga okukala omutoolinkundana. Iilonga ya nika oshiponga. Iikundaneki otayi vulu okuyambukapo natse otatu vulu okuyambukapo,” omuleli gwaNamibia ta ti.
Omutumba ngoka gwa ningwa ogu li oshiyetwapo shomupresidende na ogwa nuninwa aadhindoli yiikundnaeki ya ye moonkundathana nomuleli oshowo oominista dhimwe po dhokabinete.
Geingob okwa pula iikundaneki opo yi kale aluhe tayi gandja oonkundana dhomondjila nokukwashilipaleka uuyuki.
“Otatu vulu okukala twa yooloka uuna tashi ya kiilonga ihe natu tseyithe oonkundana nawa. Aatoolinkundana oye lilepo okugandja oonkundana dhomondjila ihe haku kundaneka omitoto,” Geingob ta ti.
Geingob okwa popi kutya sho a li omupilima gwoshilongo oshowo ominista yIipindi ina ya ontuku yiikundaneki na okwa kala aluhe a pyakudhukwa okugandja uuyelele kiikundaneki.
Omupilima Saara Kuugongelwa-Amadhila ngoka naye a kala momutumba ngoka okwa pula iikundaneki yi tsikile nokulongela kumwe nepangelo opo ku kalekwe po ombili negameno.
Kuugongelwa-Amadhila okwa popi kutya onkalo yokutoola oonkundana gwaahenako nasha otagu nyana nokushundula ethano lyoshilongo, omanga aatoolinkundana yamwe ya popi kutya omauyelele gepangelo naga kale aluhe taga gandjwa, unene aanambelewa yomauyelele yepangelo oshowo oominista dhimwe dhoka hadhi tindi okupopya naatoolinkundana. Ominista yOmauyelele nOmakwatathano goPautekinika, Tjekero Tweya okwa zimine kutya iikundaneki inayi tindilwa omauyelele goshigwana.
“Uuyelele inawu tindilwa oshigwana nongele itamu mono omauyelele okuza kiikondo yimwe ningeni ekwatathano nangame opo ndi idhopemo,” Tweya tati.
Pethimbo lyomutumba ngoka Geingob okwa gandja woo omayamuluko kombinga yoHarambee Prosperity Plan, ndjoka omugandjimayele gwiipambele yomupresidende John Steytler a tseyitha kutya oya nuninwa okukondjitha oluhepo oshowo okwahethikepamwe konkalo yopauntu mokati kAaNamibia.
Category: