Aanyasha mboka ya thika lwopo-200 oya popi kutya itaya thigipo ehala ndyoka omanga inaya pewa iilonga.
Aanyasha mboka oya yamukula ketumwalaka lyoparadio lya ningwa mEtitano lya piti kutya aanona ayehe yekondjelomanguluko mboka ya unga oontanda poombelewa dhoSwapo moshilongo ashihe naya shune komagumbo yo ya ka tegelele omalombwelo ngoka taya ka pewa molwaashoka oyiishangitha nale nepangelo.
Ongula yOmaandaha osha holoka kutya etumwalaka ndyoka inali uvika. Ongundu yomOshakati oya pula uuyelele wa gwana kutya omolwashike ye na okuthiga po ehala ndyoka.
Omunashipundi gwongundu ndjoka Tuhafeni Nhinda, okwa holola kutya oya uvithwa nayi komukalo ngoka gwa longithwa okugandja uuyelele kuyo na oya popi kutya ngele ope na uuyelele we ya pamba nena Swapo okwa li e na okutuma aakalelipo ye kuyo unene amushanga-ndjai Nangolo Mbumba opo e ya talele po nokupopya nayo. Nhinda okwa popi kutya osha simana opo omatokolo ngoka taga ningwa ye ga lombwelwe pambelewa na haku pitila moradio yoshigwana.
“Itatu yi sigo uuna ndoka taye tu lombwele momukalo kutya omolwashike tu na okuya. Oya pumbwa okutulombwela iinima ayihe naantu mboka taya popi kutya oya shangwa oya shangwa uunake,” Nhinda ta ti.
Okwa popi kutya oku unga oontanda poombelewa oonene dhoSwapo ogwo owala omukalo taya vulu okulongitha opo epangelo li tale komakemo gawo. Sho aningilwa omapulaapulo, Mbumba okwa popi kutya etoloko lyepangelo oshowo lyelelo lyongundu kutya aanona mboka naya shune komagumbo na kashi shi etokolo lya ningwa kombelewa ye.
Mbumba okwa tsakanene naakwatakanithi yoombelewa shoSwapo dhopaitopolwa mOvenduka mEhuliloshiwike na Mbumba okwa popi kutya inaya kundathana oshikumungu shaanona mboka.
“Oshigongi shoka osha tameke mEtitano ina ku kundathanwa aanona yekondjelomanguluko,” Mbumba ta lombwele oNamibian Sun.
Omukwatakanithi gwoSwapo mOshana, Erastus Kapolo okwa popi kutya etumwalaka lyomoradio kali shi oshinima oshipe molwaashoka epangelo olya kala nokupula aanona mboka ya shune komagumbo omanga tali ya kongele iilonga.
Omupopiliko gwongundu yaanyasha mboka mOshakati, Ndilipunye Hainyanyula okwa ekelehi omaiyuvo goshigwana kutya aanona mboka aakolokoshi.
“Tse katu shi aakolokoshi na ka tu na uupyakadhi naaleli yetu taye ya ye tu popithe, oye shi aavali yetu mpoka ya fumbikwa,” Hainyanyula ta ti.
KENYA KAMBOWE