Konima yoomwedhi 11 sho ali a falwa koshilongo shaandjawo nokuhanganithwa nofamili ye sho a kala moNamibia uule woomvula 37, Elias Molise Malhibela okwa hulitha mEtiyali.
Omunamimvo 78-a tseyika nedhina Oupa Elias, okwa li a falwa koshilongo shaandjawo koLesotho meyambidhidho lyehangano lyOmushigakano Omutiligane.
Ofamili ye oya monika sha landula oshinyolwa sha nyanyangithwa koshikundanekifo shoNamibian Sun moka omukokele ngoka a pula eyambidhidho opo a mone ofamili ye.
Omusilishisho gwe nale na okuli omunashipundi gwoHenties Bay Silver Hair committee, Walter Nel, okwa hokolola kutya onkundatha yeso lye ondhigu okutaambako.
Okwa holola woo kutya okwa uvithwa nayi molwaashoka ofamili yaNel inayi vula okugandja efumbiko lyopamuthika omolwa ompumbwe yoshimaliwa.
"Omukokele ngoka twa kala tu mu hole nomuJuni otwe mu hanganitha nofamili ye moLesotho okwa hulitha," Nel ta ti.
Nel okwa popi kutya ota dhimbuluka omathimbo omawanawa ngoka ya kala pamwe naElias oshowo ongulohi ya hugunina ndjoka a kala naye megumbo lyaayenda mOvenduka mondjila yokuya kokapale koodhila.
"Inandi pitika omulumentu a lale oye awike muuyuni mboka kuye yuli oshinima sha yooloka. Ongula ya landula onde mukwathele opo iiyoge na onde mu gwayeke , oshinima shoka ngame inandi ningila nokuli tate gwandje," Nel ta ti.
"Ngashiingeyi Oupa Elias okwa ya na itandi ke mu mona wee kombinga ndjika. Otandi kala aluhe noku dhilaadhila omathimbo ngoka. Omwenyo gwe nagu vululukwe nombili."
Omanga ina shuna koMaseru, nakusa Elias okwa kala omukalimo gwomoHenties Bay. Ye pamwe nofamili ye oye ya moNamibia pethimbo lyuukoloni pamwe nomugandji gwe gwiilonga. Ofamili ye oya shuna koSouth Afrika ihe ye okwa tokola okukala moNamibia. Malhibela okwa longela omina yaRössing Uranium Mine nokonima oka ka kala ta hupu mokukwata oohi.
ELVIS MURARANGANDA