‘Aanona yekondjelomanguluko’ ya holoka mompangu

Aanyasha mboka oya holoka mompangulilo yaMangestrata gwaKatutura mEtitatu, sha landula sho aanyasha ya thika pu7 ya tulwa miipandeko omolwa oshipotha sheponokelo lyomuhingi gwombesa.
Pauyelele mboka wa gandjwa kOmunambelewa Omupopiliko gwOpolisi yaNamibia, Slogan Matheus okwa ti, yatatu yomaanyasha mboka oya mangululwa konima molwaashoka aniwa inaku vulwa okumonika ekuthombinga lyawo moshiponokela shoka.
Mboka ya holoka mompangu oya tumbulwa komadhina kutya oAmutenya Hailonga, Johannes Kalenga, Ruben Amon naTobias Andimba.
Iinima yongushu yooN$15 638, unene iimaliwa oya yakwa okuza komuhingi ngoka adhengwa, Likius Nanghalu.
Pauyelele wa gandja komufali gwiihokolola kompangu gwepangelo, Maria Andimba, “Aanona yekondjelomanguluko oya dhenge Nanghalu noongonyo oshowo oodhimbo sha ningilwa pokamba yoNdilimani popepi noBrakwater pondje yaVenduka nelalakano okumuyeka iinima ye.”
Nanghalu, 45, okwa ehamekwa noonkondo na okwa thigwa nokwaako kwa teka,eehamekwa momutse, okamunwe okashona kokolulyo ka teka sho adhengwa nokudhangagulwa.
Oshiponokelwa shoka osha ningwa shoNanghalu a pitike gumwe gwomaanona mboka pofaalama ndjoka mOsoondaha. Mangestrata Desere Kamboua okwa tindile omboloha aatamanekwa mboka yane na otaya kala mondjeedhililo sigo osho taya ka galukila komeho gompangu momasiku 17 gaMei.
Lwopokati mpoka, Matheus okwa popi kutya opolisi oya ulike oongundu mbali dhaakonaakoni opo dhi konaakone omaponokelo ga holola pokati kaanona mboka nooyene yooplota moBrakwater kuyele nuumvo.
Ongundu yimwe otayi konaakono omanyenyeto gooyene yooplota omanga onkwawo tayi konaakona ngoka gaanona yavalelwa mekondjo pondje yoshilongo.
Matheus okwa popi kutya ooyene yooplota oya patulula iipotha yomiyonena ine mushimwe, gumwe gwomaanona mboka pamwe nahekulu oya tulwa miipandeko konima sho oshilwitho sha yakwa pethimbo lyiikolokosha pokati koongundu dhoka mbali sha adhika megumbo lyahekulu moKatutura.
“Omakonaakono kombinga yomanyenyeto gooyene yooplota oga manithwa ombinga yimwe.”
Aanona mboka nayo oya patulula iipotha ine nomakonaakono oga manithwa nale.
“Uuna omakonaakono okuza koombinga adhihe ga manithwa nena omapeko otaga ka tumwa komutokoli-ndjai opo a ka ninge etokolo miipotha mbyoka.”
JEMIMA BEUKES