Omundohotola OmuCongo e li kokondalaka yUuministeli wUundjolowele okwa tulwa miipandeo konima sho sha monikamo kutya okwa kala ta longo mokapangelo ke kopaumwene omanga e li mefudho lyopambelewa okuza kiilonga ye yepangelo.
Omundohotola ngoka a za koDemocratic Republic of Congo, okwa tumbulwa kedhina kutya oJean Paul Masasa Ilunga.
Okwa kwatwa ta longo iilonga ye yopomunghulo komukwatheli gwopaumwene gwOminista yUundjolowele Bernahard Haufiku ngoka pamwe nomumwayinamati gwomupolisi ya yi kuye onga aapangwa.
Ilunga okwa kala ta longele moshipangeo shepangelo shaKatutura omanga okapangelo ke kopaumwene keli woo moKatutura. Pahapu dhaHaufiku shoka oshi li owala eeto polweela lyiilonga yuulingilingi tayi longwa kaanambelewa yopaunamiti mboka taya longele epangelo.
Okwa popi kutya otaku ningwa omakonaakono omanene omolwa iilonga tayi etitha omapulo yoondohotola dhaazaizai dhoka hadhi longele miitopolwa yomuushayi.
“Okwa tulwa miipandeko omanga oKrismas inayi ninga. Ope na iinima oyindji tayi ningwa naashika otatu shi ithana kutya uulingilingi. Omuntu a tya ngaaka ota pitikwa ngiini a longele uuministeli?” Minista ta pula.
Minista okwa popi kutya otaka longa a manamo opo a kuthemo aalongi yuulingilingi ayehe muuministeli. “Oshe ya polweela kutya omundohotola ngoka oku na oomikanda dhoopasport mbali na oha longitha omashainokaha ga yooloka uuna ta ta shanga pomakalata gaapangwa moshipangelo shepangelo naamboka ye yopaumwene.”
Konima owala sho a ningi ominista omvula ya piti, Haufiku okwa gandja ekunkililo kaaniilonga yuuministeli mboka haya ningi oongeshefa dhopaumwene.
Okwa holola kutya aaniilonga mboka ohaya yi momafudho yo taya ka topola iifuta yolutayima naamboka taya longo pomahala gawo nomalongekidho ngoka aniwa ohaga ithanwa ‘okapana’
“Omukalo ngoka oguli iilonga yuulunga. Omupangi gumwe okwa landa ohauto nokonima sho a lundululilwa koshikondo sha yooloka okwa kala nuupyakadhi molwaashoka ita vulu we okutufa iifuta yohauto yokomwedhi,” Haufiku ta ti.
Okwa nyana aaniilonga yuuministeli mboka taya longitha omaliko gepangelo moongeshefa dhawo dhopaumwene.
Omukomeho gwOkakomisi kOkukondjitha Uulingilingi Paulus Noah, okwa zimine etulo miipandeko ihe okwa holola kutya kali e na ontseyo ngele omundohotola ngoka omukwashigwana gwaCongo.
JEMIMA BEUKES