Aaniihauto oya pepelelwa sho ondando yomahooli ya gu pevi ohela, nolupandu otalu pewa Uuministeli wIikwamina nIikwankondo mboka wa ningi etokolo ndyoka oshiwike shika.
Oondando dhopahwata dhomahooli godiesel odha gu pevi noocenda 30 molita omanga ondando yopahwata yomahooli gopetrol go95 ya gupevi noocenda 50 molita.
Oondando dhomahooli komunkulofuta ngaashingeyi odhili ngaashi tashi landula: omahooli gopetrol go95 ooN$10.04 molita, odiesel 500ppm ooN$9.42 molita omanga odiesel 50ppm ooN$9.47 molita.
Sho a yelitha etokolo lye Minista Obeth Kandjoze okwa popi kutya ondando yomahooli oya pumbwa okushunithwa pevi pondondo ndjoka tayi vulika kaayeti yomahooli moshilopngo naalandi kwiikwatelela konkalo yopamalanditho gopauyuni.
"Nonando ondando yomahooli oya gu pevi muuyuni aaniihauto moshilongo inaya tyapula egwo pevi ndyoka unene sho ongushu yiimaliwa yaNamibia ya gu okuyeleka niimaliwa yaAmerika," minista ta ti.
"Ongaashi atuhe tu shi kutya omahooli ohaga landithwa miimaliwa yaAmerika naashoka otashi ulike aayeti yomahooli moshilongo ohaya landa kondilo. Monena ondjele yiimaliwa yaNamibia okuyeleka niimaliwa yaAmerika oya thikama pooN$15.82."
"Olopta yoPetroleum Activities Return (PAR) oya ulike kutya aapunguli moshikondo shiikwamahooli itaya likolasha kiiyemo yawo mbyoka taya tula mongeshefa ndjoka onkene ope na ompumbwe onene yokushunitha pondando onkalo yelikolo ndjoka tayi kanana woo aapunguli moshikondo shoka," Kandjoze ta ti.
Uuministeli onkene owa gandja e yo pombanda lyelikolo noopresenda 8 molita kehe omanga wa gandja oocenta 86 molita komayakulo ga yooloka moka mwa kwatelwa elongitho lyomapungulilo gomahooli oshowo iifuta kehe hayi holokapo mongeshefa yomahooli.
DENVER ISAACS