Ekwatho ndyoka lyiikwamashina yookompiuta yongushu yoomiliyona 79 okuza kepangelo lyaIndia otayi ka kwathela epangelo opo li pingenepo omakalata giipangelo ngoka haga longithwa monena nuukalata mboka tawu vulu okulongithwa komashina.
Shika osha tseyithwa kOminista yUundjolowele nOnkalonawa , Bernhard Haufiku, pethimbo lyoonkundatha na dha ningwa kuuministeli we pamwe nehangano lyaIndia lyoIndus Healthcare mOmaandaha.
“Otu na uukalata moka omo hatu shanga oondjokonona gomauvu gaayakulwa ihe uuna uukalata mboka wa kana nena ohatu tamukulula ishewe,” minista ta ti.
Okwa holola woo okuuva nayi kwe kutya Namibia okwa ndopa okutaamba omukuli tagu zi kuIndia gwoobiliyona 1.5 ngoka gwa nuninwa iikwaniipangitho yomashina oshowo omiti.
“Kanda li ndi na ontseyo yomikuli dholudhi ndoka. Inatu ninga nawa sho twa pewa ehiyo kuIndia. Otwa pumbwa okuyambulapo ekwatathano lyetu naIndia molwaashoka India oshilongo sha huma nge tashi ponkatu yopaunamiti nomiti dhoCipla dhoka hatu longitha odha longwa moIndia,” minista ta ti.
“Otwa pumbwa okupapatela uutekinilondji unene nge tashi ya kiikumungu mbyoka hayi tu pula mondjato otwa pumbwa okutaambako omahiyo gomapekaapeko nomadheulo.”
Omapopyo gaminista oga kolekwa nokuyambidhidha kusupritende gwOshipangelo shaKatutura Nelago Amugulu, ngoka a popi kutya Namibia okwa pumbwa aatseyinawa muundjolowele yaIndia uuna oondohotola dhe dhotango dhoka tadhi dheulwa dha manitha omailongo gadho nokukala tadhi longo.
“Inashi pumbwa okukala omalongekidho gopauhupi na otaya ka pumbiwa okugandja omakwatho nokuthitika omwaka ngoka guli po ihe sho tashi kala oshiwanawa osho taya ka gandja uunongo. Omuyalu omunene gwaadheulwa Aanamibia otagu ka tameka iilongadheulo naashoka oshiikwatelela kutya ope na aatseyinawa yomuyalu guthike peni,” Amugulu ta ti.
Pahapu dhe, aalongwandohotola ya thika po-300 okwa tegelelwa ya galuke komailongo gawo okuza pondje yoshilongo nenge meni lyoshilongo nuumvo na okwa tegelelwa ya ka tameke nomaidhelo gawo miipangelo yepangelo ihe omolwa ompumbwe yoondohotola dha pyokoka moshilongo uuministeli okwa holokwa tawu ka taamba owala aalongwa mboka ya thika po-120 miipangelo yepangelo.
JEMIMA BEUKES
Category: