Aakokele mOnooli yaNamibia oya popi kutya oshimaliwa shooN$100 shoka sha gwedhelwa oshikwiila shawo shoka haya mono okuza kepangelo kehe omwedhi otashi ka ninga eyooloko moonkalamwenyo dhawo.
Pethimbo sho kwa tseyithwa omutengenekwa gwopashigwana gwepangelo gwomvula yonuumvo, ominista yEmona Calle Schlettwein oya tseyitha kutya oshimaliwa shoka hashi pewa aakokele kehe omwedhi otashi gwedhelwa nooN$100 nomonena oshi li ooN$1 100.
Schlettwein okwa popi kutya egwedhelo ndyoka olya nuninwa okukondjitha oluhepo ndoka lwa taalelwa kaakokele yetu.
Maria Elia, 62, gwomomukunda Omalaala mOshitopolwa shaShana okwa lombwele oNamibian Sun ta ti ye okwa pandula nokwanyanyukwa noonkondo mokuuva egwedhelo ndyoka.
"Onda nyanyukwa nepangelo lyetu nali pandulwe sho tali ningi oonkambadhala dhokuyambidhidha aantu yalwo," Elia ta ti.
"OoN$100 dhoka dha gwedhwako kadhi shi odhindji ihe otadhi ka ninga omalunduluko."
Okwa popi kutya oshimaliwa shoka otashi ka ninga omalunduluko meyambidhidho lyofalimi ye unene aatekulu ye.
Omukokele gwomomukunda Omafo mOshitopolwa shaHangwena, a kuutumba posheelo shOshipangelo shEpangelo mOshakati ta hili ombiga ye yomakaya okwa popi kutya okwa pandula epangelo omolwa egwedhelo ndyoka.
"Onda nyanyukwa sho twa gwedhelwa nooN$100 unene tuu ethimbo ndika sho twa taalela oshikukuta. Nonando otwa lokwa omasiku ga piti itatu ka vula okulikola iikulya ya gwana nuumvo," omukokele ngoka ta ti.
"Ngashiingeyi otandi vulu okulanda osuuka nomakaya gandje oshowo iipumbiwa yilwe."
Aakokele oya li ya gwedhelwa nooN$400 omvula ya piti.
KENYA KAMBOWE
