Oshimaliwa shoka sha tseyithwa pethimbo kwa tseyithwa omutengenekwathaneko gwopashimaliwa gwepangelo nuumvo, okwa hololwa kutya oshi li omuyalu omunene tagu pewa ehangano ndyoka.
Osha tseyithwa kutya ehanganp ndyoka otali ka mona oshimaliwa shoobiliyona 2 okuza kepangelo muule woomvula ndatu twa taalela moka mwakwatelwa oshimaliwa shoomiliyona 730 momumvo gwo2017/18 oshowo 736 mo-2018/19/
Moshikakomvula sho 2014/15 ehangano ndyoka olya pewa oshimaliwa shoomiliyona 472 oshowo oomiliyona 579.8 momumvo gwo2015/16.
Omauyelele giimaliwa mbyoka yapewa ehangano ndyoka oga holoka pethimbo mpoka oshigwana tashi pula epangelo opo li hulithepo omukalo gokugandja iimaliwa komahangano ga yama kepangelo nenge li shunithe pevi omuyalu gwiimaliwa mbyoka hayi pewa omahangano ngoka go ga vule okulonga nuudhiginini.
Ehangano limwe ndyoka lya pewa oshimaliwa oshindji natango nuumvo ehangano lyaTransNamib ndyoka tali ka mona oshimaliwa shi li pombanda noomiliyona 12 okuyeleka noomiliyona 300 dhoka dha pewa ehangano ndyoka omvula ya piti. Momvula yo-2014/15 ehangano ndyoka olya pewa oomiliyona 181.
Omahangano gamwe ngoka taga ka pewa iimaliwa oyindji ongaashi NBC ngoka ta pewa oshimaliwa shoomiliyona 252, Namibia Airport Company ngoka ta pewa oshimaliwa shoomiliyona 155, oNamibia Housing Enterprise oomiliyona 100 oshowo oSME Bank oomiliyona 78.
Oshimaliwa shoobiliyona 20.8 otashi pewa opoloyeka yoMedium Term Expenditure Framework (MFTEF) moka oobiliyona 20 dha topolwa kutya oobiliyona 6.5 odho 2016/17, oobiliyona 7 odho 2017/18 noobiliyona 7.3 odhomvula yo-2018/19 .
Omukomeho nale gwoOld Mutual Africa CEO, Johannes !Gawaxab okwa popi kutya egandjo lyiimaliwa komahangano ngoka ga yama kepangelo nali shunithwe pevi pehala lyokukala owala iimaliwa mbyoka tayi pewa omahangano ngoka tayi londo pombanda kehe omvula.
Sho a popi pethimbo lyomutumba gwokukundathana omutengenekwathaneko gwopashimaliwa gwepangelo gwonuumvo, ngoka gwa kaliwa woo kominista yEmona Calle Schlettwein, !Gawaxab okwa popi kutya omahangano gamwe ngoka oga kanitha ondjila onkene oga pumbwa okutalululwa go ga tameke okukala taga imonene iiyemo kugogene.
MERJA IILEKA