OSwapo Party Youth League (SPYL) oya wayimine oompata kombinga yototwaveta yoEquitable Economic Empowerment Framework (NEEEF) Bill, na oya pandula epangelo omanga tayi pula ku gandje ethimbo ele okwiikundwa ontotwaveta ndjoka.
Ontotwaveta ndjoka ndjoka oya tulwa poshitaafula sha landula sho Omupilima Saara Kuugongelwa-Amadhila a gandja omayele kombinga yomilandu dhaSouth Afrika dhoka dha nuninwa okunkondopeka aaluudhe.
“Nonando otwa tokola okutsa kumwe niinima yimwe tayi adhika montotwaveta ndjoka, SPYL ota pula ombelewa yomupilima opo yi gandje ethimbo lya gwana koshigwana," Amushanga gwiikwaliko mo-SPYL Tomas Iindji.
Iindji okwa popi kutya oya pandula epangelo sho lya tula poshitaafula ontotwaveta ndjoka ihe okwa pula opo ku gandjwe ethimbo lya gwana kaakuthimbinga ayehe moshikumungu shoka ya vule okugandja omayele nomadhilaadhilo gawo omanga inayi shainwa nokuningwa oveta.
Omapopyo gaIindji oga landula omapopyo ga Desmond Amunyela ngoka a nyana uule owala wiiwike iyali mbyoka ya pewa oshigwana opo shi tye sha kombinga yontotwaveta ndjoka. Konima Kuugongelwa-Amadhila okwa lelepeke ethimbo sigo omuApilili.
OSPYL oya pula opo ku tulwe miilonga omulandu gwokutala ondjele yegandjo lyiilonga komahangano taku yelekwa nuunene wontumba. Iindji okwa popi kutya omahangano ge na aaniilonga ya thika po-35 okuya pombanda oga pumbwa okupewa oshinakugwanithwa shokugandja iilonga kaakwashigwana mboka ya kala inaya talika nale yoopresenda 60.
"ONEEEF oya pumbwa okukala tayi kondolola ekuto miilonga nokukatuka oonkatu kwaamboka itaya gwanitha po omulandu," Indji ta ti
SPYL okwa hala woo eyambidhidho lyepangelo paimaliwa komahangano ngoka taga ka kuta miilonga aakwashigwana mboka ya kala inaya talika monakuziwa.
"Ope na iifuta yomadheulo, iifuta yompumbwe yontseyo, ethimbo oshowo iifuta yokukuta miilonga."
Iindji okwa pula woo elongelokumwe lyiiputudhilo yaUnam naNUST nepangelo menkondopelo lyaanangeshefa.
SPYL okwa popi kutya ota tsu kumwe nOntotwaveta ndjoka yoNEEEF sho tayi pula opo oongeshefa dhuunene wontumba dhi gandje oopresenda 1 yiiyemo konima yiihohela yepangelo momapungulo goshigwana.
Oya tsu kumwe woo kutya epangelo nali gandja olupandu kaanangeshefa mboka taya toto nokufala oongeshefa dhawo moshigwana.
ELVIS MURARANGANDA