Oshikondo shomatembukilo moshilongo oshi li tashi longo nuudhiginini poongamba dhoshilongo opo shi kwashilipaleke kutya aantu mboka taye ya moshilongo oya tuntilwa tuu okuza komukithi tagu ithanwa yellow fever.
Omukalelipo gwEhangano lyUundjolowele mUuyuni Professor Monir Islam, okwa tseyithile AaNamibia kutya inaya pumbwa okutila nenge okukala momalimbililo sho kwa tukuka oolopota dhomukithi gwoyellow fever moshishiindalongo Angola.
"Oshikondo shomatembu shaNamibia oshi li komalwilo naayehe mboka taye ya moshilongo okuza miilonga mbyoka tayi fekelwa yi na omukithi ngoka oye na okuulika omaumbangi goonzapo kutya oya tuntilwa nangele hasho itaya pitikilwa mo moshilongo," Islam ta ti.
Pauyelele mboka wa pitithwa kepangelo lyaAngokla, etukuko lyomukithi ngoka moAngola olya faalela oomwenyo dhaantu 125 yomaantu 664 mboka ya kwatwa komukithi ngoka gwa lopotwa lyotango momasiku ga5 gaDesemba okuza komukwashigwana gwa Eritria moshikandjo sha Viana.
Okuza nkene omukithi gwa lopotwa, ogwa taandele miitopolwa yilwe ngaashi Bie, Benguela, Cunene oshowo iitopolwa yilwe ya thika pu-8 nomaso oshowo iipotha oyindji oya lopotwa moshilandopangelo Luanda.
Islam okwa popi kutya ope na ompito onene opo omukithi ngoka kagu taandele moNamibia. Namibia okwa tseyithila oombelewa dhaakalelipo ye ayehe miilonga ya gumwa komukithi ngoka opomboka taya talelepo Namibia ya kale ya ntutilwa komukithi ngoka yo taya vulu woo okuholola uumbangi kutya oya tuntilwa shili.
Namibia mboka taya yi kiilongo mbyoka nayo oya kunkililwa oo ya kale ya tuntilwa.
"Angola okwa ningi oshikonga oshinene shetuntilo gwomikithi ngoka gwoyellow fever. Omukithi ngoka hagu taandelithwa koomwe na ogwa pumba moNamibia ihe oshili shimwe shomiipumbiwa opo kehe gumwe ngoka teya moshilongo a kale a ntuntilwa okuza komukithi ngoka," Islam ta ti.
Kape na natango omuti gwomukithi ngoka gahu taandele miilongo yi na oluhwa muAfrika oshowo mUumbugantu waAmerika na ohagu keelelwa owala paku tuntilwa.
Etuntilo ndyoka olya kala shimwe shomiipumbiwa kwaamboka taya ya yi moAngola nonando oshilongo shoka inashi lopota omukithi ngoka okutameka momvula yo-1986.
Ehangano lyoWHO olya ulike omiyalu kutya iipotha ya thika po-130 000 yomukithi ngoka oya lopotwa konyala kehe omvula na oya etitha omaso ga thika po-44 000 muuyuni noopresenda 90 dhomaso ngoka omiilongo yaAfrika.
MERJA IILEKA
Category: