Omupeha Minista, Nghipondoka, ngoka naye e li omulongwa nale poskola ndjoka okwa holoka okuuva nayi kwe omolwa onkalo moka mu na iikwathitho yelongo poskola ndjoka ihe okwa holola kutya okwa nyanyukilwa iizemo yaanaskola.
Omupeha minista okwa li ta popi pethimbo lyoshituthi shegandjo lyomapapa golupandu kaanskola mboka yeshi enditha nawa, oshituthi shoka sha ningwa mOlyomakaya ga piti.
"Ondi li nda nyanyukwa okukala mpaka nena niizemo yekonaanono lyopashigwana lyondondo onti-10 mbyoka mwa likola omumvo gwa piti otayi nyanyudha. Iizemo yeni otayi holola omungo omunene nge tashiya kiilonga tayi longwa kaandunguki poskola ndjika nongushu yelongo," Nghipondoka ta ti.
Okwa popi kutya okukala nomukumo monkalamwenyo otashi nkondopeke aantu sho vulithe okukala nonkalo yokwaahena omukumo.
"Aanaskola mboka yaahena omikalo otaya ningitha iilonga yaalongi yawo naavali iidhigu mokuyapa eyambidhidho lyelongo ndyoka taya pumbwa meyambukepo lyawo."
Nghipondoka okwa popi kutya omashongo aluhe opo haga kala ihe omukalo ngoka aantu haya taalele omashongo ngoka ogwo unene gwa nika oshiponga.
"Uuna tandi popi omaipulo gomukumo oshowo euveko lyaanaskola, inandi tongolamo aavali oshowo aakuthimbinga ayehe melongo. Omuvali e na omukumo melongo lyokanona ke ota vulu okuninga kehe shoka tashi pumbiwa opo a yambidhidhe okanona ke na okuna omukumo mokanona ke aluhe."
Omukuluntuskola, Immanuel Nepela okwa popi kutya aanaskola yondondo onti-10 mboka ya shanga ekonaakono omvula ya piti oya piti ekonaakoono ndyoka noopresenda 86.7 naNepela okwa tsu omukumo aanaskola yiilonge ya manamo nokutsikila nokuliko iizemo iiwananwa.
Aanaskola mboka ya pewa omapapa oya mono omagano goonzapo oshowo embo lyefatululo lyiitya yElaka lyOshiingilisa.
KENYA KAMBOWE