Oompanda dha thika po-34 odha dhipagwa moshikunino shiinamwenyo shaEtosha okutameka omvula ndjika.
Uuyelele mbuka tawu halutha owa tseyithwa komupeha omukonaakoni gwIilonga mOpolisi yaNamibia, Mayola-Ndjai James Tjivikua ngoka a tseyitha uuyelele mboka pethimbo a holoa e yo komeho lyiilonga ya nuninwa okukondjitha uukongo waali paveta mEtosha.
Iilonga mbyoka oya kala mEtosha okutameka omvula ya piti niilonga mbyoka otayi kwatelwa komeho uule woomwedhi ndatu kukehe gumwe gwomaakomeho yopolisi yaShana, Oshikoto, Omusati, Otjozondjupa noKunene.
Tjivikua okwa tseyitha ekutheko lyoshinakugwanithwa shoka ngashiingeyi kukomanda gwopolisi yaShikoto Anna-Marie Nainda, ngoka ta kwatele komeho iilonga mbyoka uule woomwedhi ndatu dhili komeho. Nainda ota kutha oshinakugwanithwa shoka kukomanda gwOpolisi yaMusati, komufala Shinedima Shidinge.
Tjivikua okwa popi kutya nonando okwa tulwa miipandeko aafekelwa ya thika po-30 nekutheko lyiilwitho iita mbyoka inayi hula sho olopota dhoompanda niiyamakuti yimwe ya dhipagwa tadhi tsikile nokupula komeho.
Pauyelele mboka wa gandjwa kuTjivikua, oompanda 34 odha dhipagwa nale omvula ndjika. Okwa popi kutya oompanda dhoka odha adhika momahala moka hamu patololwa kolupadhi mEtosha oshowo moPalmwag/Klip River mOshitopolwa shaKunene.
Okwa ti oompanda 5 odha adhika moPalmwag/Klip omanga o29 dha adhika mEtosha.
AaNamibia yane mboka ya tulwa miipandeko muDesemba moKlip River oya kwatakanithwa nuukongo woompanda dhoka dha adhika dha dhipagwa momulonga gwaKlip nuumvo.
Tjivuka okwa popi woo kutya omukwashigwana gwaChina naye okwa tulwa miipandeko mOvenduka muFebruari gwonuumvo sho aadhika no abalone yookilograma 90 oshowo ooniga dhoompanda dhondjundo yookilograma 1.15 dhoka dha za koompanda dha yooloka.
Omakonaakono goDNA otaga ningwa opo ku talike ngele ooniga dhoka otadhi kwatathanithwa noompanda dhoka dha dhipagwa.
Tjivukua okwa popi kutya nuumvo inaku monika natango ondjamba ya dhipagwa nonando omukwashigwana gwaZambia gumwe okwa tulwa miipandeko muJanuari e na omayego goondjamba gaali nakaku shiwike natango kutya omayego ngoka oga za peni.
Omvula ya piti, Namibia okwa kanitha oompanda 83 oshowo oondjamba dha thika po-50 onga oshizemo shuukongo waali paveta.
ELLANIE SMIT