Konyala omimvo mbali dha piti, aanamukunda ya thika po-200 oya thigwa momapandanda nomugwila melambo lyokwaahena iilonga, nokulongitha owala iikolitha.
Shoka osha etithwa sho elelo lyaWitvlei, omukunda tagu adhika oshinano shookilometa 150 okuza mOvenduka mondjila yokuya koGobabsi , lya pata okatomeno sha etithwa konkalo yokwaahatsa kumwe pokati kepangelo nomupunguli ngoka a li a kwatele komeho okatomeno hoka.
Omupya omunene, omukunda ngoka omushona guna aakwashigwana ya thika po-5 000 monena okwa kwatwako owala koondingosho, aalandithi yomomapandaanda mboka haya landitha iilandithomwa yawo kaalongithindjila yaTrans-Kalahari Highway.
Omukunda ngoka otagu adhika moshikandjohogololo shaOkarukambe mOshitopolwa shaMaheke.
Monena aagandji yiilonga momukunda ngoka, ehangano owala lyaHunters Pride Taxidermy, ndyoka lya kuta aaniilonga 30 oshowo oskola yaNossob Combined School ndjoka ya kuta aalongiskola 33 oshowo aaniilonga yalwe ya thika po-50.
Oompito dhilwe dhiilonga dhili po momukunda ngoka omokaklinika owala oshowo moombelewa dhelelo lyomukunda.
Opoloyeka ndjoka yali tayi longo omunino gwomeya nogwiiyekelwahi oya kalekwa manga nomatompelo gaaheshiwike nolusheno momukunda ngoka ohalu guko aluhe ngele taku lokwa. Elelo lyomukunda ngoka oli na oongunga dhaNamWater dha thika pooN$800 000.
Onkalo momukunda ngoka otayi limbilike noonkondo sho mboka yaahena iilonga taya ningi oongangala nokulonga iikulumuna onga omukalo gwokwiimonena sha, pahapu dhomunangeshefa gumwe.
Kansela gwomukunda ngoka na okuli omukuluntuskola moskola yaNossob Combines School, Ben Geingob okwa hokolola kutya omukunda ngoka ogwa mwena na kape na unene shoka tashi inyenge momukunda ngoka.
"Kakele otu na ofakitoli tayi longo iizalomwa na oyo owala ofakitoli ya patuluka momukunda nguka. Ope na woo ompito yopoloyeka yoondjuhwa yi patulule," Geingob ta ti.
Okwa popi kutya elelo ohali mono oshimaliwa shoomiliyona 1.5 kehe omvula okuza kepangelo niimaliwa mbyoka oya nuninwa oopoloyeka, ooN$800 000 ya nuninwa iilonga yelelo ndyoka oshowo eyambidhidho lyopashimaliwa okuza kelelo lyOshitopolwa shaMaheke.
Okwa popi kutya iiyemo mbyoka inayi longithwa pamulandu kelelo lyomukunda nale ihe onkalo ndjoka otayi ningi oshinima shomondjokonona sho yo taya pangele okuyambulapo omukunda ngoka.
Iiyemo mbyoka otayi ka longithwa unene moshitopolwa shomanduluko, omatalelepo oshowo okukondjitha oluhepo.
"Otu na einekelo kutya omukunda nguka gwa mwena otagu vulu ishewe okupenduka po. Otatu tala komahala gomukunda gwetu mpoka tatu vulu okutula omahala gomagumbo gaakwashigwana oshowo oongeshefa."
Geingob okwa popi kutya elelo itali ka hiya owala aapunguli, ihe otali ka yambidhidha woo aanamukunda yalyo ya kwatele komeho onkalo yopaliko momukunda.
"Otatu ke ya yambidhidha noompangela dhongeshefa, otwa hala ya mone omakwatho okuza kOmbaanga yOmayambulepo. Otatu ka kwathela aakalimo yetu ya ninge omukunda omuwanawa naapunguli. Oshinima shimwe evi, evi otali ka kala kondando tayi vulika kukehe gumwe."
Okwa popi kutya elelo lyawo olya tula po ompangela ndjoka tayi ka yambidhidha aanamukunda ya tule miilonga oopoloteka dhawo dhomanduluko.
Okwa popi kutya ondungethaneko ayihe oya nuninwa okulundululila omukunda ngoka momukunda gwopangeshefa yoofabulika muule woomvula ntano.
Elelo lyomukunda ngoka olya yakula nale oompangela dhopangeshefa okuza kaanamukunda mboka ya hala okutamekitha oopoloyeka dhiingulu noohi.
Okwa popi kutya elelo otali ka konaakona mpoka ke na oonzo dhomeya nokutotapo oshikunino shopaunamapya noohi.
"Elalakano lyetu okutala uunima uushona mboka hawu landithwa pondje kepangelo nokukambadhala okutotapo oopoloyeka dhokulonga iinima mbyoka opo yi vule okulandithwa. Itatu tila okuya methigathano naSouth Afrika."
ELVIS MURARANGANDA