Omukalo gwepingenepo lyaantu nomashina gomalombota moshikondo shoohi oshi li omukundu omunene gwa taalela ehangano lyoTrade Union Congress of Namibia (TUCNA).
Dhoka oohapu dhomupresidende gwounion ndjoka Paulus Hango, ngoka a popi kutya omashina ogeli taga pingenepo aaniilonga moshikondo shelongo lyoohi.
"Aaniilonga oyendji ihaya longo we omvula ayihe omolwa omashina gopamuthika gwopombanda ngoka taga longithwa. Omahangano ohaga kwata oohi dhago taga endele nokushunitha pevi oowili dhiilonga oshowo omiyalu dhaaniilonga. Omashina ngoka ohaga longo gaahe na oluthuwo," Hango ta ti.
Hango okwa popi ngaaka momukanda gwe pethimbo lyomutumba gwokomvula gwoshikondo shoohi ngoka gwa ningwa kOminista Bernard Esau mOmbaye mEtitano lya piti.
Pahapu dhe omahangano gaaniilonga otaga piyagamekwa konkalo ndjoka na otaga ka thiminikwa ga katuke oonkatu ngele onkalo ndjoka inayi kundathanwa.
Okwa pula Uuministeli wOohi wu kale nokugandja ookota dhokukwata oohi kwiikwatelelwa komiyalu dhaaniilonga ya kutwa komahangano gokukwata oohi ngoka taga ningi omaindilo.
ONamibian Food and Allied Workers Union (NAFAU) oya pula oshikondo shoka shi gwanithepo omilandu dhaaniilonga nokuyanda onkalo yomakanka ngaashi ngoka taga ningwa kaalongi yomomeya okutameka omwedhi dha piti.
"Inatu hala uupyakadhi wa faathana ngaashi mboka wu li po nale waaniilonga yeli mekanka. Otwa kala nokupula efuto lyomalitayi muule woomvula dha piti ihe oshikondo inashi tu pulakena na osha kondjitha owala kutya okomisi yoohi oyo ya pingenepo iifuta mbyoka," Omukatakanithi gwelongo gopashigwana gwoNAFAU, Lister Tawana ta ti.
NAFAU okwa pandula etsokumwe ndyoka lya shainwa kUuministeli wAaniilonga nomahangano omakalelipo gaaniilonga momasiku 11 gaNovemba 2015.
OTIS FINCK