Omupresidende gwaNamibia okwa popi kutya ondjila ndjoka ya tungwa koshimaliwa shoomiliyona 576 ndjoka yaza mOmafo mOshitopolwa shaHangwena sigo omUutapi mOshitopolwa shaMusati otayi patulula oompito dhoongeshefa nomatalele po miitopolwa mbyoka iyali.
Geingob okwa poi ngaaka pethimbo a patulula ondjila ndjoka mEtitano mOutapi.
Okwa popi kutya emanitho lyopoloyeka ndjoka oshinima shimwe sha simana mondjokonona yeyambulepo lyiikwaniipangitho yekoko lyomaliko moSouthern African Development Community (SADC) unene pokati kaNamibia nAngola.
"Ondjila ndjika otayi ka gandja omakwatathano gopoondjila pokati komikunda mOmusati nOhangwena nokupatulula oompito dhongeshefa nomatalelepo miitopolwa mbika iyali."
“Otayi ka longa onga esipa lyombunda momayambulepo goondjila dhopaitopolwa sho ya ningi po elila lyomUuzilo-Uninginino waSADC pokati kaKatima Mulilo mOshitopolwa shaZambezi nAngola okupitila moKatwitwi nOshikango mOshitopolwa shaKavango nOhangwena," Geingob tati.
"Oshi li elalakano lyandje lyokutsikila nomusindalandu gwelongululo newapaleko oshowo enanununemo lyoondjila nokukwashilipaleka kutya oondjila dhetu odhi na egameno, nokuyambulapo iinyangadhalwa yopaliko meeto nenge efalo lyiinima pondje yoshilongo meni lyoshilongo oshowo pondje yoongamba," omuleli gwaNamibia ta ti.
Okwa pula aalongithindjila ya longithe ondjila ndjoka nokuyi kwata nawa.
Geingob okwa pandula oRoads Authority, aakomeho naaniilonga yoNamibia Project oshowo ehangano lyaChina Gezhouba Group sho ya manitha iilonga yondjila ndjoka.
KENYA KAMBOWE