Ngaashi omukalondjiigilile aluhe kehe omumvo, ondando yomakaya oshowo iikolitha oya yi pombanda ishewe sha landula etseyitho lyomutengenekwathaneko gwoshimaliwa shepangelo shomvula yonuumvo, ngoka gwa tseyithwa kOminista yEmona Calle Schlettwein.
Pethimbo a tseyitha omutengenekwathaneko ngoka gwongushu yoobiliyona 66 mOmutumba gwoPashigwana mEtine lya piti, Schlettwein okwa popi kutya iihohela mbyoka otayi yi miilonga momasiku 24 gafebruali nuumvo.
Schlettwein okwa tseyitha omutengenekwa gwe konima owala yesiku limwe sho Ominista yEmona lyaSoutha Afrika, Pravin Gordhan a tseyitha eyopombanda lyondando yomakaya niikolitha. Namibia okuli oshitopolwa shoSouthern African Customs Union (Sacu), neyopombanda ndyoka otali yi miilonga meendelelo.
Iihohela yokapakete komakaya o-20 oya yi pombanda noopresenda 6.7 okuza pooN$12.43 okuya pooN$13.24 nokandooha kombiila yoomililita 350 oka londa pombanda okuza pooN$1.24 okuya poN$1.35.
Iihohela komaviinu oya londa noopresenda 8 (oosenda 24).
Iikolitha yilwe mbyoka ya longwa miiyimati oya londo noopresenda 8.5 (ooN$6.21 molita) omanga iihohela komalovu omalulu ya londo nooN$3.77 sigo opooN$48.13.
Omakaya oga londo noopresenda 6.7 nooN$4.68 dha gwedhwapo omanga omakaya gokombiga ga londo noopresenda 7.
Iihohela yomakaya niikolitha moSouth Afrika oya kala nokuya pombanda yondjele yondando yiilandithomwa okutameka omvula yo-2002.
Momutengenekwathaneko gwo-2016/17 ondjele yiihohela yeeto lyiinima moshilongo miilonga ayihe oya yi pombanda noopresenda dhili pokati ka 6.7 no8.5.
MERJA IILEKA