Okuza momwedhi Januari okuya momwedhi Juli, Opolisi yaNamibia kOshikondo shEtulo mIilonga Oompango dhIingangamithi, oya tula miipandeko Aanamibia 650 oshowo aazaizai 63 taya tamanekelwa iipotha yi na sha niingangamithi.
Omiyalu dhoka otadhi ulike kutya elanditho lyiingangamithi moNamibia otali kwatelwa komeho kAangola, Aakongo nAaburundi mboka yeli mokamba yOontauki mOsire ndjoka tayi adhika pondje yaTjiwarongo.
Omupopiliko gwOpolisi yaNamibia, Edwin Kanguatjivi, okwa popi kutya opolisi otayi longo nuudhigu mokuya moshipala iilonga yoongangala dhoka hadhi landitha iingangamithi molwaashoka otadhi kotoka esiku nesiku.
Okwa popi woo kutya yamwe po yomaazaizai otaya longitha omukalo gwokuya moondjokana nenge momakwatathano gohole naaniilonga moshikondo shekalekepo lyooveta opo ya vule okulonga iilonga yawo yuungangala.
Onga oshizemo shonkalo ndjoka aanambalelwa yamwe yekalekepo lyooveta monena oya iyadha taya tamanekelwa iimbuluma yoludhi ndoka.
Omunambelewa omupopiliko gwopolisi okwa holola kutya olukanda lwedhina Damara Location mOvenduka olumwe lyomomalukanda ngoka ga ninga omahala gaalandithilo giingangamithi. Aanyasha oyendji okwa holola taya longitha iingangamithi mbyoka tayi landitha kaazaizai.
Okwa popi kutya konyala mookona adhihe oto adha aanona yaamati yamwe ye na oomvula 14 yeli muungundu nomakonakono oga ulike kutya ohaya landitha iingangamithi.
Mboka haya landitha pakathimbo ohaya kala owala nomuyalu omushona gwiingangamithi opo ngele oya kwatwa kopolisi nena otaya pewa omboloha muule wethimbo efupi.
“Otwa tseya kutya aantu oyendji unene mboka taya landitha iingangamithi moDamara Location otaya longithwa kaazaizai mboka taya lumbu mokamba yaSire. Iingangamithi unene mbyoka yococaine oya nika oshiponga noonkondo molwaashoka aalandithi mboka ohaya tulamo uuzigo wokudhipaga oombuku nenge oVim opo iingangamithi yi ninge oyindji,” Kanguatjivi ta ti.
Omuyalu gwaamboka taya landitha iingangamithi mbyoka otagu londo pombanda molwaashoka aalongithi ohaya pikwa meendelelo kelongitho ndyoka na ohaya tameke taya longo iimbuluma. Kanguatjivi okwa popi kutya elongitho lyiimbuluma mbyoka ohali etitha woo uupyakadhi wopamadhilaadhilo oshowo omikalo
omiwinayi.
Omunamivo 30, ngoka a tseyika nedhina Isabela okwa lombwele oNamibian Sun kutya, “Onda kala tandi longitha ococaine uule woomvula 10 dha piti. Inandi longekidha kutya onkalamwenyo yandje otashi vulika yi kale ngiika ihe kokulongitha iingangamithi kwandje okundji oko ngaa konkalo yandje tayi kala ngiika. Onda longa iilonga oyindji mbyoka ngame inandi pandula. Opo owala ngame ndi vule okulongitha iingangamithi mbyoka ohashi vulika ndiye momulalo nomuntu opo a vule okupandje iingangamithi. Onda yakapo iinima yaantu aapopepi nangame mwakatelwa aakwanezimo yandje na onda hanagulapo omakwatathano gaantu oyendji mboka ndi hole.”
Okwa hololwa kutya uusiku oshowo mehuliloshiwike olyo ethimbo ndyoka omuntu ha vulu okumona kutya egumbo lini tali landitha iingangamithi molukanda ndoka molwaashoka oohauto odhindji ohadhi kala pegumbo ndyoka aantu taya landa iingangamithi
yawo.
“Aantu oyendji ohaya kala mpaka, aaluudhe, iilumbu nekehe tuu unene aakiintu oye hole okukala mpaka molwaashoka uuna aalumentu ya landa iingangamithi olundji oye hole okuya nokukatyapula pamwe naakiintu,” onzo yimwe ya holola.
Oyendji ohaya holola kutya yamwe ohaya kala noombele nenge uumbi na ohaya vulu okumonitha aantu iiponga niilwitho mbyoka onga omukalo gwokwiimonena iiyemo yokulanda iingangamithi.
OVENDUKA KAKUNAWE SHINANA