Elijah Ngurare, Job Amupanda, George Kambala naDimbulukeni Nauyoma, mboka ya tidhwa mOngundu yoSwapo omwedhi gwa piti, otaya ka pataneka etidho lyawo mompangu.
Mboka yane, oya tidhwa mongundu sha landula ekuthombinga lyawo neyambidhidho lyehwahwameko tali ithanwa Affirmative Repositioning movement ndyoka tali pula egandjo lyevi lyokutunga omagumbo kAanamibia.
Ngurare, Amupanda, Kambala naNauyoma oya popi kutya ongundu tayi pangele inayi landula omilandu pethimbo ye ya tidha mongundu.
Etidho lyaanapolitika mboka yatatu olya e ta etopokauko mongundu tayi pangele sho yamwe ya popi kutya etidho lyaamboka yatatu otali ka etele ongundu uupyakadhi monakuyiwa.
Omukalelipo gwopaveta, Norman Tjombe, okwa popi kutya mboka oye na oshipotha shi na oonkondo. Omutseyinawa gwEkotampango, Nico Horn, okwa popi kutya ongundu otayi ka konga omukalo gwokutidha aanapolitika mboka ngele oya sindanapo oshipotha
shoka.
Amushanga-Ndjai gwOngundu Nangolo Mbumba, okwa lombwele oNamibian Sun kutya otaka yamukula owala komapopyopo ngoka ngele ya pewa omikanda dhopampangu.
Momaandaha , Amupanda okwa pititha omukanda pehela lyawo ta popi kutya oya ninga eindilo lyopampangu opo ya pataneke etitho lyawo.
“Molwaashoka etidho ndyoka kali li pamulandu, otwa kala ta tu pula Ongundu yoSwapo opo yi talulule etokolo okupitila muAmushanga –Ndjai Mbumba molwaashoka oSwapo ota pangelwa koompango,” Amupanda ta ti.
Omukanda ngoka ogwa tsikile kutya ongundu oya idhimbike omapulo gaanapolotika mboka nokugwanitha po uundemokoli oshowo ompango ndjoka tayi kwatele komeho
ongundu.
“Omanga twa tegelela opo tu ka pangulwe kongundu ngaashi twa li twa uvanekelwa kuMbumba otwa mono ombapila yetidho okuza kongundu.”
Pahapu dhaAmupanda omatokolo ageye ngoka oga ningwa pwaahena uundemokoli.
Amupanda okwa koleke kutya omolwa omatokolo ngoka ga ningwa kOngundu yoSwapo inaku landulwa omilandu otaya ka konga ekwatho lyopampangu nokugandja ethindilemo opo ku kale taku ningwa omatokolo kwiikwatelelwa koompango nuyuuki.
“Otu na einekelo momusindalandu gwetu gwuuyuki na otwa pyakudhukwa okulwitha nokupataneka omatokolo ngoka ga ningwa nonando otashi pula tu ye kompangu yopombandambanda moshilongo.”
Lyopokati mpoka okwa holoka omananathano mokati kEwawa lyAanyasha mOngundu yoSwapo konima sho kwe ya polweela kutya ooamushanga yopaitopolwa ya thika pomugoyi oya ningi omutumba naMbumba, nomutumba ngoka gwa utha ewawa lyelelo lyopokati li ninge omutumba
ohela.
Omutumba ngoka ogwa holola kutya ekutho miilonga lyomupeha amushanga gwEwawa lyAanyasha na okuli oshilyo shopaliamende, Veikko Nekundi oshowo Laina Shapange ka li li pauyuuki.
Ooamushanga mboka oya holola kutya sha landula etidho lyaNgurare, Amupanda, Kambala naNauyoma, Ewawa ndyoka otali pangele opo li konge omukalo gwokupula komeho oshowo okukalekapo ethano lyawo.
Ngoka ta longo onga amushanga gwEwawa ndyoka Eddie Kafita okwa pula kutya oonkondo dhooamushanga yiitopolwa opo ya ninge omutumba nokuninga omatokolo ngoka odha gandjwa kulye.
OVENDUKA ELVIS MURARANGANDA
Category: