Ehangano li lilepo aalongiskola moshilongo lyoTeachers Union of Namibia (TUN) olya holola omaiyuvo galyo kombinga yomusindalongo omupe ngoka kwa tegelelwa gu tulwe miilonga momvula twataalela.
Omupresidende gwehangano ndyoka, Mahongora Kavihuhua, okwa lombwele oshifokundaneki shoNamibian Sun kutya omusindalandu ngoka inagu tuminwa natango ooskola na okwa holola woo omaiyuvo ge kombinga yompumbwe yaalongiskola moshilongo.
“Otaya kalonga shike? Omusindalongo ogwo ombiimbeli yaalongiskola. Omusindalongo ngoka inagu pewa natango oskola nena aalongi otaya ka longitha omusindalongo ngoka omukulu?†Kavihuhua a pula.
Sho ku na owala oomwedhi onshona opo ku tulwe miilonga omusindalongo omupe, Kavihuhua okwa popi kutya aalongiskola kaye shi natango kutya oshike ya tegelelwa ya ninge.
“Oye na owala ontseyo kutya omusindalongo otagu lunduluka momvula twataalela ihe keye shi natango kutya omalunduluko geni geli momusindalongo ngoka omupe,†Kavihuhua ta ti.
Omadheulo
Omukomeho gwoshiputudhilo shoNational Institute for Educational Development (NIED), Dr Hertha Pomuti, okwa lombwele oNamibian Sun ta ti, omusindalongo omupe otagu ka tulwa miilonga kwiikolelewa komalunduluko agehe taga ningwa.
Okwati, omusindalongo gwoondondo dhopetameko ngoka tagu tulwa miilonga momvula twataalela ogwa taambiwako nale na okwa tegelelwa gu tuminwe ooskola momwedhi Novemba.
Pomuti okwati, omadheulo gaadheuli ogali ga ningwa momwedhi Juni.
Iilongitho yaadheuli okwa tegelelwa yika tumwe moshiwike shotango shomwedhi Kotomba na otaya ka gandja omadheulo kaalongi yoondondo dhopevi miitopolwa ayihe moshilongo pokati komasiku 24 gaNovemba sigo omasiku 9 ga Desemba.
“Okwa tokolwa omadheulo ga ningwe muule wiiwike mbyoka iyali opo kaga ye moshipala ootundi. Uuministeli owu wete kutya inashi wapa okukutha miilonga aalongiskola opo ya kapewe omadheulo ngoka,†Pomuti ta ti.
Sho a pulwa ngele ehangano lyoTUN otali vulu okukala oshitopolwa shaamboka taya pewa omadheulo ngoka, Pomuti okwati, ngele aalongiskola yoondondo dhoka dhopetameko oyeli iilyo yehangano ndyoka nena otali vulu oku kala oshitopolwa shomadheulo ngoka.
Pomuti okwati, Uuministeli wElongo otawu ka tuma omambo kooskola moshiwike shotango shomwedhi Januari momvula twa taalela na okwa pula aakuthimbinga ayehe moshikumungu shoka opo ya yambidhidhe etulo miilonga lyomusindalongo ngoka.
Omunambelewa ngoka okwa popi kutya okwa ningwa oonkundathana niilongo ngaashi; Finland, Germany, Britain, Mauritius, South Africa and Zimbabwe.
Oondondo
Ominista yElongo David Namwandi, oya tseyitha kutya omusindalongo moshilongo otagu lundululwa momvula twataalela, na otagu tameke noondondo dhopevi nomomvula 2016 otaku lundululwa omusindalongo gwoondondo ndhoka dha landulako . Mo 2017 otaku ka tulwa miilonga omusindalongo gwondondo onti-8 sigo ondondo 13 ndjoka tayi tulwa miilonga mo-2020.
Namwandi okwati, iimaliwa ya thika pomiliyona 21.7 oyiikalekelwa okutula miilonga omusindalongo ngoka moshikakomvula sho-2015 sigo 2016.
Kombinga yomadheulo ngoka taga ka ningwa muule wiiwike iyali, Kavihuhua okwa nyana kutya ethimbo ndyoka efupi okutala kiinima mbyoka kwa tegelelwa yi ka lundululwe ngaashi etulo miilonga lyiilongwa iipe nokutala woo kompumbwe yaalongi.
Okwa pula woo ngele omambo gooskola otaga ka thika tuu kooskola pethimbo momvula twa taalela a yeleke nomvula yonuumvo sho ku na natango ooskola kadhi na omambo goskola.
Kavihuhua okwa popi woo kutya otaya ka shangela omukanda amushanga ta kalele muumunisteli mboka opo ehangano lyawo li kale oshitopolwa shomadheulo ngoka taga ka pewa aalongiskola.
OVENDUKA SELMA IKELA