Iilonga yoshikondo shuuyuki mOndoloopa yaNdangwa oyili mehalakano noonkondo molwaashoka ompangu ndjoka yopashitopolwa oya kala kayi na omupanguli uule woomwedhi ndatu.
Omanga aanambelewa yompangu ya holola kutya onkalo oya nayipala nayi, aanandholongo oya nyenyeta kutya oya loloka okukala taya falwa kohofa kehe esiku ihe iipotha yawo ohayi undulilwa owala komeho omolwa ompumbwe yomupanguli.
Onkalo ndjoka oya tameke momwedhi Februali nuumvo konima sho okondalaka yiilonga yomukwashigwana gwaZimbambwe , Hope Ngara, ngoka a li omukomeho gwompangu yaNdangwa ya thiki pehulilo na okwa lombwelwa kutya okondalaka ye itayi vulu oku tsikila molwaashoka ompito ndjoka yiilonga otayi vulu okulongwa komukwashigwana gwaNamibia.
Ompito yiilonga ndjoka oyali ya tseyithwa ihe ka pena omukwashigwana gwaNamibia e na ontseyo a ningi eindilo. Ngara naye okwa ningi eindilo ihe eindilo lye inali talika na okwa pewa owala okondalaka yoomwedhi 12 opo a vule okukala ta gandja ekwatho manga taku kongwa omupanguli omupe ihe pethimbo ndyoka okwa mono woo iilonga iipe mOshikondo shOmayakulo goPampango mOshitopolwa sha Zambezi moKatima Mulilo.
“Okutameka momweedhi Juli sigo onena oshinakugwanithwa shoka osha kala komupanguli gwopevi, Ninja Hochobes, ngoka ta kwatele komeho iipotha ayihe ngaashi; iipotha yomiyonena, iipotha yaakwashigwana, oondjokana, omiyonena dhomomagumbo, iipotha yi na sha nuunona oshowo iilonga ayihe moshikondo shuuyuuki. Mbyoka iilonga oyindji noonkondo komuntu gumwe ngoka e li woo nokuli omupanguli gwopevi,†omunambelewa mompangu ndjoka apopi.
ONamibian Sun oya mono omanyenyeto okuza kaanandholongo mboka natango ya tegelelwa okupangulwa mOndangwa kutya ohaya yi owala kohofa ihe ihaya pangulwa niipotha yawo ohayi undulilwa kehe ethimbo komeho molwaashoka ka pe na omupanguli.
Omunambelewa mompangu yaNdangwa okwa popi kutya iipotha ya thika po-50 okwa tegelelwa yi pulakenwe mompangu ndjoka momwedhi tuli nonando shoka oku wetike kutya itashi ka ningwa molwaashoka ka pe na omupanguli ngoka ta vulu okukwatela komeho omuyalu omunene gwiipotha mbyoka.
Oonkambadhala oku mona omukomeho gwoompangu dhopevi, Harris Salionga, odha ponyo molwaashoka ongodhi ye yomombelewa inayi yamukulwa.
OSHAKATI PLACIDO HILUKILWA