Nonando epangelo oli na uuthemba wokuningila oongeleka omakonaakono, itali vulu okulongitha ompango opo li indike aantu kaya mbombolokele koongeleka dhoshinanena nenge ya ye komagongalela gaahunganeki ngaashi Shepherd Bushiri, John Walters gwOmbudsman ta ti.
Papahu dhaWalters, sigo oshowo uuthemba wokuya meitaalo lyongeleka ndjoka wa hala tawu gamenwa kekotampango lyoshilongo nena oongeleka otadhi tsikile nokuninga odhindji naantu otaya tsikile nokulandula oongeleka dhoka.
Walters okwa popi ngaaka, ta yamukula komapopyo ga ningwa ku attorney-general, Sacky Shanghala, ngoka a popi mOmutumba gwoPashigwana kutya epangelo olya pumbwa okuningila oongeleka dhoka omakonaakono nokugamena aantu.
Shanghala okwa pula kutya aatotiveta oya tegelela ngiini ya longe noshikumungu shoka shelongitho nayi lyaakwashigwana ngele aanambelewa aakuluntu oye li aalanduli yomuhunganeki Bushiri nayamwe oyo nokuli taya longekidha omagongalo goludhi ndoka.
“Otu na ontseyo yoongeleka dhimwe muSADC dhoka dha litha aalanduli yadho omayoka nomwiidhi,” Shanghala ta ti.
Okwa gwedha po kutya okwa pumbwa okuningwa omakonaakono ngele oongeleka dhoka shili otadhi gandja omakwatho koshigwana nenge otashi kengelele owala aakwashigwana.
Ominista yUukashike kOokantu nOnkalonawa yAanona, Dorren Sioka naye okwa nyana oongeleka dhiikengelela dhoka woo aniwa tadhi lombwele aalanduli ya kaye miihulo nooyina opo ya vule okuninga aakengeli.
Sioka okwa kwatwa melaka kOmupopi mOmutumba gwoPaliamende Peter Katjavivi, sho a li ta popi kombinga yomaulodhi taga ningwa aniwa koongeleka dhoka oshowo ekano lyiilyo yaantu.
Omupresidende gwoAll Peoples’ Party (APP), Ignatius Shixwameni okwa popi kutya Namibia oshilongo tashi pangelwa kompango onkene itashi vulu oku indika aantu ya ye koongeleka hoka ya hala okuya.
“Ngame kandi shi omulanduli gwaBushiri ihe nena otatu ka tokola kutya oongeleka dhiikengelela odhini po?” Shixwameni ta pula.
Aanamibia omayovi oya mbombolokele mokapale kaSam Nujoma kuyele omwedhi tuli opo ya ka tale nokupulakena komuhunganeki gwaMalawi a tseyika nawa koyendji Shepherd Bushiri.
Aayambidhidhi oyendji okwa popiwa ya futu oshimaliwa shooN$ 1000 opo ya kalye uulalelo nomuhunganeki ngoka omanga yalwe ya futu iimaliwa ya thika po- N$100 000 ya kuutumbe poshitaafula shimwe naBushiri.
Egongalo ndyoka okwa lopotwa lya kaliwa kaanambelewa aakuluntu mepangelo , nOmupopiliko gwUuministeli wIikwameni, Salome kambala okuli gumwe gwamaaunganeki yegongalo ndyoka.
JEMIMA BEUKES
Category: