Oompangulilo dhaNamibia odha pulwa opo dhi kale tadhi tala nawa uuna tadhi gandja oompito dhokwiifutila moondjeedhililo kaatamanekwa yiipotha yomakwatonkonga, sha landula sho aantu yamwe mboka ya pewa oomboloha haya ka longa ishewe iikulumuna.
Natango, okwa kolekwa kutya aatamanekwa ohaya ka ya mekwatathano noonakuninga iihakanwa yomiyonena nenge oombangi miipotha mbyoka naashoka nashi ninge omatompelo gokwiindika egandjo lyomboloha. Ngoka omaiyuvo gaDianne Hubbard omukwatakanithi gwomiyonena dhopaukashike kookantu moLegal Assistance Centre.
Nonando Hubbard okwa popi kutya ke na uuyelele wa gandjwa moshipotha shaMangestrata nale Jaco Kennedys, ngoka ta tamanekelwa iipotha yekwatonkonga na ina vulu oku popya unene, okwa gwedha po kutya okwaahena ondjo sigo omuntu a monika ondjo kompangu nashi kalekwe momadhilaadhilo.
“Otwi inekela kutya oompangu nadhi kale dha kotoka uuna tadhi gandja oomboloha kaantu mboka ya tamanekelwa nale iipotha,” Hubbard ta ti.
Kennedy, ngoka eli woo gumwe gwomaanaveta, okuli modholongo sho omupanguli mompangulilo yaKatutura e mu tindile omboloha mEtitano.
Ota tamanekwa kutya okwa kwata onkonga omukiintu omunyasha pethimbo aniwa e mu pe olefa okuya kiilonga.
Aniwa okwa kwatele onkonga omukiintu ngoka mohauto ye nalwanima okwe mu fala piilonga.
Nakutamanekekwa ngoka ta tamanekelwa nale oshipotha sha faathana okwa tindilwa omboloha omolwa egameno lyanakuninga oshihakanwa nuutile kutya otaka ya omakonaakono moshipala.
Omutamanekwa pethimbo a ningi eindilo lyomboloha okwa popi kutya oye owala omusilishisho gwaanegumbo lye ihe okwa ndopa okuyelitha kutya omukulukadhi gwe pamwe namumwayina gwomulumentu mboka taye mu kwathele mokufuta omboloha ohaya kwata ingapi.
Magistrata Bernedine Kubersky, okwa popi kutya nonando omutamanekwa okwa popi kutya esiku ndyoka taku popiwa kutya olyo a kwata onkonga omukiintu ngoka, ooshapi dhohauto ye yOmashete odha li komukulukadhi gwe, okwa ndopa okwiithana omukulukadhi gwe mompangu opo a gandje uumbangi mwaashoka.
Mangestrata okwa gwedha po kutya nonando epangelo inali pataneka kutya omutamanekwa ngoka ali nale a pewa omboloha moshipotha sha faathana okwa li a yi a koSoutha Afrika nokugaluka, shoka kashi shi etompelo kutya omolwashike e na okupewa omboloha.
Okwa popi kutya iipotha yoludhi ndoka otayi ndumbala mompangu onkene ompangu oya pumbwa okwiidhopamo na okwa tindi okugandja omboloha.
FRED GOEIEMAN