Aakwaita nale yEtanga lyoSouth West African Territory Force (SWATF) noKoevoet ya thika peyovi limwe oya yi komatungo gopaliamende oshowo kOombelewa dhOmbudsman okuza moRed Flag Commando Hall moKatutura opo ya ka gandje omikandanyenyeto dhawo moka taya pula opo ya dhimbululwe nokupewa uukwatya woonakulwa aakulu.
Mboka oya kala ya unga oontanda moshinyanga shiigongi shaCommando konyala uule woomwedhi mbali ngashiingeyi na oya popi kutya otaya ka ninga omahololomadhilaadhilo uuna epangelo inali pulakena komakemo gawo.
Monena aanapolitika owala aashona ya tsakanene nayo, ngaashi Omukwaniilwa gwaaHerero, Vekuii Rukoro oshowo omukomeho gwEtanga lyOpolisi yaNamibia, Sebastian Ndeitunga.
Ehololomadhilaadhilo ndyoka lya ningwa mEtitatu olya ningwa unene kaalumentu yomuhoko gAaaHimba nAaHerero, aakokele aalumentu naakiintu pamwe naatekulu yawo oshowo aakiintu mboka oyana nenge aasamane yawo ya li nale aakwaita ihe oya hulitha.
Poshikunino shopalimande oya adha kwa keelelwa konyala kaapolisi ya thika pe-100 nondjila ndjoka yuuka kopaliamende oya tetwako. Aahololimadhilaadhilo oya hadhwa omanga inaya pitikwa okuya meni lyoshikunino shopaliamende hoka ya ka gandja andola omukandanyenyeto gwawo kOmupopi mOmutumba gwoPashigwana Peter Katjavivi.
Nonando ongaaka Katjavivi ina vula okutaamba ko omukanda gwawo ngoka gwa pewa omukalelipo.
Momukanda gwotango oNamibia War Veterans Trust (Namvet), oya pula Katjavivi opo a pule omutumba gwoPashigwana gu ninge omalundululo mOmpango yOonakulwa Aakulu yomo-2008.
Mboka oya pula opo ompango yi lindululwe molwaashoka ngashiingeyi otayi tongola, yo oonakulwa aakulu ayehe taya pewa omauwanawa itaku talwa kutya oyali aakwaita yoongundu dhini po.
Momukandanyenyeto omutiyali, Namvet okwa pula Jon Walter gwOmbudsman a ningile ompango ndjoka omakonaakono.
Ehangano lyaashi lyopapangelo lyoNamRight olya li nalyo lya kondema ompango ndjoka kutya oya tongola aakwaita nale yoSWATF noKoevoet omolwa omatompelo gopapolotika.
Pampango ndjoka mboka taya talika kutya oonakulwa aakuu oomboka owala yali taya kondjele emanguluko lyoshilongo nge pondje yoshilongo nenge meni lyoshilongo momukalo kehe ngoka yali taya longithwa.
Iilyo nale yoSWATF noKoevoet oya shuna koCommando konima sho ya ningi ehololomadhilaadhilo lyawo na oya holola kutya otaya kala pehala ndyoka sigo ya mono omayamukulo okuza kepangelo. Omunashipundi gwoNamvet, Jabulani Ndeunyema okwa popi kutya otaya tegelele sigo omasiku gatatu gaApilili uuna inaya pewa omayamuluko nena otaya ka katuka onkatu ontiyali.
CATHERINE SASMAN