Ehangano lyoNamibia Chamber of Commerce and Industry (NCCI) olya pula opo Ominista yOshikondo shOmalweendo moshilongo, Alpheus !Naruseb yiidhope moshikumungu shoondando dhomalweendo gomewangandjo moshilongo.
Momukanda ngoka gwa pitithwa, omunashipundi gwoNCCI mOshitayi shomOnooli yoshilongo, Tomas Iindji okwa popi kutya ehangano lyawo olya mono omanyenyeto ogendji okuza kiilyo yawo mbyoka tayi nyenyeta kutya oondando dhaAir Namibia odha londa noonkondo.
“Iilyo mbyoka otayi nyenyeta e yo pombanda lyoondando dhoka tadhi etitha e yo moshipala lyomalweendo gawo niifuta yopangeshefa yi li pombanda oshowo egameno onkene ehangano otali pula nesimaneko ombelewa yoye opo yiidhopemo moshikumungu shika,” omukanda gwa holola.
Indji okwa popi kutya ehangano lyoAir Namibia ehangano lyoshigwana noondando dhalyo andola odha pumbwa okukala tadhi vulika kukehe gumwe ihe oshili ooshoka kutya oondando dhoka itadhi vulika. Indji okwa longitha oshiholelwa shiiponga tayi yi pombanda moondjila dhaNamibia na okwa popi kutya oondando dhuutekete waAir Namibia nadhi shune pevi.
“Omalweendo gomewangandjo naga kale omukalo gwa gamenwa gomalweendo molwaashoka itatu vulu okukala tatu kanitha oomwenyo odhindji miiponga yomoondjila kaantu yetu mbyoka ye li aanani yeliko lyoshilongo shetu. Omatukodhila gomoshilongo naga kale taga vulika kukehe OmuNamibia, inapu dhigala omuntu.
Iindji okwa pula ehangano lyoAir Namibia oshowo oNamibia Airport Company ya longele kutya molwaashoka ogo gamwe gomomahangano moshilongo ngoka ga yama kepangelo. Omupopiliko gwoAir Namibia Paul Nakawa okwa popi kutya omanyenyeto goNCCI oge ya pethimbo ewanawa sho omalweendo gomatukodhila mokapale kaNdangwa ga tameke ishewe iiwike itatu ya piti, sho omalweendo ngoka ga li ga kalekwa omolwa emanitho lyiilonga mokapale hoka.
“Otu li pokutameka nokutula miilonga iiyetwapo yetu yomvula ndjika tuli, neshunitho pevi lyoondando oshimwe shomiiyetwapo yetu yonuumvo,” Nakawa ta ti.
Okwa popi kutya oshikumungu shoondando dhili pombanda osha ninga ethimbo nehangano olya kala tali longo opo li tule miilonga omalweendo ngoka taga vulika kAaNamibia ayehe nokuhwepopaleka woo omalweendo moondjila dhaNamibia.
“Nonando ongaaka ehangano lyoshigwana oli wete kutya oondando adhihe otashi kwatelwa komeho konkalo yopaliko,” omunambelewa ngoka ta ti.
Okwa popi hugunina kutya Air Namibia ota pandula eyambidhidho ndyoka ta pewa kiilyo yoNCCI ndyoka li lilepo ewi lyaanangeshefa ayehe.
KENYA KAMBOWE