Konima owala yiiwike iishona sho omunafaalama mOshitopolwa shaTjozondjupa a tameke ta tamanekelwa oshipotha shuukulo sho a adhika nondumba yiilwitho yaana oombapila oshowo iikuti, omunafaalama gumwe natango okwa tulwa miipandeko momudhingoloko gwa faathana sho a adhika noondjembo oshowo iikuti.
Willem Maritz, 60, okwa tulwa miipandeko mEtitano mofaalama yedhina Voorslag momudhingoloko gwaHochfeld. Ofaalama ndjoka otayi adhika oshinano shookilometa 45, okuza moHochfeld.
Kwiikwatelelwa komupopiliko gwopolisi yaOtjozondjupa , Warrant Officer Maureen Mbeha, Maritz okwa tulwa miipandeko sho aniwa uulike ondjembo gumwe gomaaniilonga mofaalama ye ngoka a ka lopota oshiningwanima kopolisi. Opolisi sho ye ya pofaalama oya mono kutya ondjembo kayi na omikanda. Opolisi oya hadha ofaalama na oya a dha mo iilwitho yaana oombapila oshowo iikuti.
Maritz okwa holoka mompangulilo yaKahandja mOmaandaha ta tamanekelwa iipotha yeuliko omuntu ondjembo, omatilitho oshowo okukala niilwitho yaana oombapila pamwe niikuti. Okwa holola mompangu ke na omukalelipo gwopaveta na okwa popi kutya otaka konga omukalelipo gwopaumwene. Omutamanekwa okwa pewa ompito opo iifutilemo modholongo noshipotha osha undulilwa komasiku 14 gaMaalitsa opo omakonaakono gopolisi ga tsikile.
Kuyele omwedhi nguka, omunamimvo 53, Johannes Mostert, mwene gwofaalama yedhina Swartmodder oshinano shookilometa 135 mUumbugantu waTjiwarongo okwa tulwa miipandeko sho a adhika niikuti, oondjembo niitopitha yaana oombapila. Omunafaalama ngoka ota tamanekwa kwiikwatelelwa kOveta yEkondjitho lyIilonga yuukulo.
Oshipotha she osha undulilwa komasiku 29 Maalitsa opo a ninge eindilo lyokupewa omboloha.
ELLANIE SMIT
Category: