Otaku ka ningwa ehololomadhilaadhilo enene ngula (Olyomakaya) sho aakalimo yomoKavango East oshowo oKavango West taya ka holola omaiyuvo gawo gonayi monkalo moka ya popi kutya otaya tongolwa moshilongo.
Pahapu dhomupopiliko gwokomitiye yokuunaneka ehololomadhilaadhilo ndyoka, Matthew Singambwe, okwa popi kutya aahololimadhilaadhilo otaya ka gongala pOkapale kOmaudhano moRundu na otaya ka ninga omunyanyo momapandaanda okuya pombelewa yaNgoloneya gwaKavango East, hoka taya ka gandja omukandanyenyeto gwawo.
Singambwe okwa popi kutya onkalo yoluhepo miitopolwa mbyoka iyali otayi limbilike noonkondo konima nkene oshilongo sha mono emanguluko uule womimvo 26 dha piti.
Pahapu dhe, Iitopolwa mbyoka iyali yaKavango oyimwe yomiitopolwa ya hepa moshilongo niimaliwa mbyoka hayi pewa iitopolwa mbyoka iishona nuuna onkalo ndjoka ya tsikile nena iitopolwa mbyoka itayi ka vula okuza mo monkalo yoluhepo.
Sho a popi kombinga yokatongo kopashigwana hoka taka ningilwa iitopolwa mbyoka iyali, Singambwe okwa ti: “Okatongo kopashigwana oka kwatelamo ompumbwe nenge okwaahapewa omaliko goshilongo, uuthemba iinima nomayakulo oshowo okwaaha kutha ombinga miipambele yilwe ngaashi yopaliko, onkalathano, omidhigululwakalo oshowo opolotika.”
Okwa ti, onkalo ndjoka yokatongo otayi gumu ongushu yonkalamwenyo yaakwashigwana.
Okwa popi kutya evi lyaayehe mIitopolwa ayihe yaKavango olya kuthwako koohashikeshalye/aanenentu noshinima shoka ohaye shi ningi owala mIitopolwa yaKavango.
Aakalimo ayehe yomIitopolwa yaKavango okwa tegelelwa ya kakuthe ombinga mehololomadhilaadhilo ndyoka.
Otaku ka kala iiyenditho yokufala aantu kehololomadhilaadhilo momidhingoloko adhihe taku longithwa oondjila oonene ndatu ngaashi; Grootfontein-Rundu, Nkurenkuru-Rundu oshowo Katima Mulilo-Rundu.
Singambwe okwa popi kutya ehololomadhilaadhilo otali ningwa mehuliloshiwike molwaashoka aakwashigwana yamwe oye li aaniilonga na ohaya mono owala ethimbo momahuliloshiwike.
Ngoloneya gwaKavango East, Samuel Mbambo ina vula okumonika opo a popye ngele ye otaka kutha tuu ombinga mehololomadhilaadhilo ndyoka, ihe aanambelewa mombelewa yoshitopolwa oya kolele kutya oya tseyithilwa kombinga yehololomadhilaadhilo ndyoka. Ina ya popya ngele Mbambo otaka kala tuu a pyakudhukwa okutaamba omukandanyenyeto ngoka mOlyomakaya.
Komanda gwOpolisi moKavango East, Johanna Nkondo okwa koleke kutya oya gandja epitikilo lyeningo lyomahololomadhilaadhi gopambili.
“Ope na omilandu dhina okulandula, na odha landulwa. Aaunganeki oye tu tseyithile na oya pewa eziminino kOmukuluntu gwOpolisi. Opo tatu ka kala onga omukalo gwokukalekapo egameno nooveta ngaashi hatu shi ningi shito nge tashi ya kegongalo lyopamwe momukalo guli ngaaka.
Omvula ya piti ehololomadhilaadhilo ndyoka kwa li taku pangelwa tali ningwa inali ningwa we na okwa holoka omapopyo kutya aaunganeki oya li ya futwa. Pethimbo ndyoka aakalimo miitopolwa mbyoka iyali oya ningi omatilitho gokupata oondjila nokugandja omanyenyeto gawo koombelewa dhepangelo omolwa okatongo hoka taka ningilwa aniwa iitopolwa mbyoka nge tashi ya koopoloyeka dheyambulepo lyiitopolwa. Okuuvitike kutya omahiyo ngoka oga zi kaaleli yopamuthigululwakalo sha landula etidho lyomukomeho nale gwoshiputudhilo shoNipam, Joseph Diescho - ngoka a za moshitopolwa shoka.
Pethimbo ndyoka aaleli miitopolwa iyali mbyoka oya ithana aalelwa yawo metindo lyetidho lyaDiescho oshowo amushanga nale gwEwawa lyAanyasha moSwapo Elijah Ngurare.
Omutumba gwoludhi ndyoka ogwa ningilwe hugunina muKotomba gwo-1970 na ogwa nana Aakavango ayehe moshilongo gwa nuninwa elwitho lyepangelo lyokatongotongo lyaSouth Afrika.
PLACIDO HILUKILWA