Omuleli gwongundu yoDTA, McHenry Venaani, okwa popi kutya otaka gandja oshiyetwapo she momutumba gwopashigwana opo ku totwepo egandjo lyiiyemo yokutamekitha oongeshefa kaanyasha ngaashi tashi ningwa kuUganda, Kenya naBotswana.
Nonando ongaaka, Omunashipundi gwoNational Youth Council (NYC) Mandela Kapere okwa popi kutya Venaani okwa lata.
Venaani okwa popi ngaaka pethimbo lyomutumba gwoshuumbululwa ngoka gwa ningwa nomahangano gaakwashigwana.
“Ngele owa hala okuninga omayambulepo gwoye nena kala to vulu okufutila ooprogramma dhoye. Otandi ka gandja oshiyetwapo mopaliamende opo ku tule miilonga oshiketha shokugandja iiyemo kaanyasha ya vule okuninga oongeshefa dhawo.”
Okwa popi ngaaka molwaashoka aniwa ethimbo alihe aanyasha ya hala omikuli okuza koombanga ohaya pulwa ya gandje sha shongushu shoka tashi kalelepo omukili ngoka taya pewa.
“Oya tameka negandjo lyiiyemo kaanyasha opo ya tameke oongeshefa dhawo, nokuyapa omadheulo na otaya shunitha omikuli dhoka ihe aanyasha naya vule okumona omikuli itaya pulwa ya kwashilipaleke sha shoka tashi kalelepo omukili.”
Venaani okuuvite kutya omukalo ngoka otagu ka yambulapo oongeshefa dhaanyasha moshikondo shoongeshefa ooshona.
Uganda’s Youth Venture-Capital Fund ohayi gandja iimaliwa koopoloyeka dhaanyasha. Iimaliwa mbyoka otayi gandja ompito kaanyasha ya mone omadheulo koombaanga. Oshiyetwapo shoka osha nuninwa eyambulepo lyoongeshefa ooshona moshikondo shopaumwene. Kapere okwa lombwele oNamibian Sun kutya, Venaani okwa lata noshiyetwapo she shoka molwaashoka epangelo oli li nale komeho noonkatu dhontumba.
“Ompango oya ninga nale omagwedhelepo gokutotapo iiketha yontumba ya nuninwa okugandja omakwatho kaanyasha noonkundthana odhili pomuthika gokumanithwa,” Kapere a yelitha.
Okwa ti, shoka oshi li oshiyetwapo shoBank of Namibia na otashi yambidhidha koNYC nepangelo.
Kapere okwa ti, oprogramma ndjoka oya nuninwa okugandja ekwatho liiyemo kaanangeshefa aanyasha, itaya pulwa ekwashilipaleko lyasha na otaya tsuwa omukumo opo ya konge omukuli okuza koshikondo shoombanga.
ELVIS MURARANGANDA