Oongulu dhoskola dhina omakende ga tatuka, ompumbwe yolusheno, oombuli dha teka dhoka hashi pitile omeya oyimwe yomomaupyakadhi gataalela oskola yaOngwediva Junior Secondary School.
Aakwashigwana oye uvitile nayi onkalo moka mu na oskola ndjoka na otaya pula omayamukulo okuza kUuministeli wElongo kutya oshike oskola ndjoka itayi tembukile kehala epe ndyoka lya tungwa okutameka mo-2013. “Onkalo yoskola ndjoka otayi kenyeneke. Oongulu kadhina omakende, kape na olusheno nomakuma oga kulupa. Otwa kala twa tegelela oskola ndjoka yi tembukile komatungo ngoka omape uule woomvula mbali monena ihe sigo onena aanona otaya mono owala iihuna monkalo ndjoka ya dhigupala,” omukalimo gumwe ta ti.
Oshifokundaneki shoNamibia Sun osha talelepo oskola ndjika, na osha mono uukwashili nkene oskola ndjoka yili monkalo ya halakana.
Oskola ndjoka yi na ondondo onti-8 sigo 10. Oyi na aanaskola 345 oshowo aalongi 18.
Omukuluntuskola, Immanuel Nepela okwa popi kutya aakwashigwana oye na uuthemba okunyenyeta ihe ye ka pe na shoka ta vulu okuninga molwaashoka shoka oshinakugwanithwa shOshikondo shElongo mOshitopolwa shaShana okupopya kutya omolwashike oskola inayi tembukila komatungo ngoka omape.
Pahapu dhaangoka ta longo pehala lyomukomeho gwelongo moshitopolwa, Immanuel Aipanda, omutungi ngoka a tungu oskola ndjoka ompe ina mana iilonga.
Aipanda okwa popi kutya Uuministeli wIilonga nOmalweendo owa pewa elombwelo opo wu konge omutungi ngoka ta manitha iilonga. Nonando ongaaka ina vula okupopya kutya oskola ndjoka otayi ka tembukila uunake momatungo ngoka omape.
“Otu na ontseyo yonkalo ndjoka na otatu kandulapo uupyakadhi meendelelo,” Aipanda ta ti.
Momasiku 19 gaJuli, 2012, ehangano lyedhina WDL and Uukumwe Construction olya pewa otendela yoomiliyona 39 opo li tunge oskola ompe ndjoka ya li yi na okukala ya manithwa momasiku 17 gaMaalitsa, 2014.
Otaku fekelwa kutya ehangano ndyoka olya manapo iiyemo yokumanitha etungo.
Pahapu dhoAfshani & Afshani Architects natango ope na oshindji shoka sha pumbwa okuninga opo etungo ndyoka li manithwe.
Nonando oskola ndjoka oya taalela omashongo gonkalo ndjoka, iizemo yondondo onti-10 moskola ndjoka otayi shambula. Mokati kaanona 90 mboka ya shanga ekonaakono lyondondo onti-10 omvula ya piti, o-12 owala oyo ya ndopa na inaya mona iitsa tayi vulu okuya falitha kondondo onti-11. Nepela okwa popi kutya nonando oskola oya mono iizemo iiwanawa, itaya vulu okumona aanaskola dhingi okuza kooskola dhopevi molwaashoka aavali otaya fala oyana kooskola dhoka dhina iikwathitholongo yi li monkalo ombwaanawa.
KENYA KAMBOWE
Category: