Ehangano lyOmushigakano Omutiligane olya popi kutya otali ka gandja omayambidhidho kaakwanezimo yoonakusa 15 mboka ya sile moshiponga shohauto shoka sha ningilwa popepi nOshivelo mEtitano lya piti.
Ehangano ndyoka olya ti otali ka ka gandja omahungumwenyo koofamili dhoonakusa sha landula oshiponga shoka sha holoka sho eloli lyiipumu mumwe nokambesa mondjila yaOmuthiya-Oshivelo. Ehangano ndyoka lyoRed Cross olya popi kutya oombelewa dhawo dhopashitopolwa naaiyambi oya pewa oshinakugwanithwa shokugandja omakwatho ngoka taga pumbiwa koonakuthigwa po.
Aaiyambi otaya ka longela pamwe nomalelo oshowo omahangano gamwe mokukwashilipaleka kutya oofamili odha pewa ekwatho lyehungomwenyo ndyoka tali pumbiwa.
Amushanga-ndjai gwoRed Cross, Dorkas Kapembe-Haiduwa okwa pula aahingi opo ya kale aluhe ya tonata na oya angala ethimbo kehe.
Kapembe-Haiduwa okwa popi kutya aahingi naya kale ya dheulwa nokudhimbulukithwa oompango dhomoondjila. Na ya longwe woo nkene ye na okugandja omakwatho gopetameko uuna ya adha oshiponga.
“Oondjele yiiponga mbyoka tayi holoka moshilonga ngashiingeyi oyi li pombanda noonkondo naaNamibia oya pumbwa okukala ya limbililwa. Onkalo ota yi nayipalekwa woonkutya aahingi oyendji moondjila inaya pewa omadheulo gokugandja omakwatho gotango uuna ya adha oshiponga opo ya vule okuhupitha oomwenyo nenge ya gandje ekwatho koonakumona oshiponga.” Kapembe-Haiduwa okwa popi kutya ehangano lyawo olya pyakudhukwa okukutha ombinga kehe miikumungu ya nuninwa okuya moshipala iiponga yomoondjila. Opolisi otayi konaakono oshiponga shoka sha holoka mEtitano, noshipotha shedhipago lyaashi lyoshiningilawina osha patulululwa omuhingi gweloli Junias Kotokeni Kiingala omumamimvo 34,ngoka a hupu moshiponga pamwe naantu yalwe yaali. Kiingala okwa holoa komeho yompangu yaMangestrata gwaTsumeb ta tamanekelwa iipotha yedhipago lyaashi lyoshiningilawina ya thika po-15 noshipotha she osha undililwa komasiku 2 gaJuni.
Ehangano lyoNamibia Chamber of Commerce and Industry (NCCI) mOshitayi shomOnooli olya popi kutya oli li moluhodhi omolwa oshipotha shoka sha faalela oomwenyo 15. Omunashipundi gwoshitayi shoka Tomas Iindji okwa popi ngaaka momukanda gwiikundaneki ngoka gwa pitithwa mOmaandaha, sha landula oshiponga shoka sha ningilwa popepi noCasablanca sho eloli enene liidhenge omutse nomutse nokambesa , konyala oshinano shookilometa 13 mOnooli yaShivelo mondjila yaNdangwa -Oshivelo.
Opolisi oya lopota kutya oonakusa oya pya itaya vulu okudhimbululwa.
Iindji okwa landula moohapu dhomuleli gwaNamibia Hage Geingo ngoka apula aalongithindjila yiiyuthe koompango dhomoondjila.
iindji okwa pula woo aanangeshefa mboka yeli mongeshefa yomalweendo opo aluhe ya kwashilipaleke uukwatya wiiyenditho yawo nokuyikaleka monkalo ombwaanawa.
Omuhingi gweloli, omufaalelwa meloli omukiintu oshowo omuntu gumwe a li omufaalelwa mokambesa oha hupa moshiponga.
KENYA KAMBOWE
Category: