ONamibia National Farmers Union (NNFU), ndjoka yi lilepo aanafalama oya popi kombinga yuukwamuhoko mboka wu li mokati kaanafalama.
Okwa ningwa omutumba megumbo lyepangelo mEtiyali ngoka gwa kaliwa kaanambelewa yoNNFU, Omupresidende Hage Geingob oshowo oominista dhimwepo dhokabinete.
Omupresidende gwoNNFU,Tobia Emvula okwa popi kutya ehangano lyawo konyala olya kalelapo owala aanafaalama aaluudhe omanga ndyoka lyoNamibia Agricultural Unions (NAU) li na iilyo yaanafalama aatiligane.
Emvula okwa popi kutya etopoko ndyoka oli li eshongo kepangelo molwaashoka ngashingeeyi ota oli ungaunga nomahangano gaali.
“Tse otwiinekela kutya omunafaalama omunafaalama owala kutya omuluudhe nenge omutiligane nongele okuna ofaalama yopangeshefa nenge ke na sha.”
Pahapu dhaEnvula etopoko ndyoka monakuziwa olya etitha omayambulepo niiyetwapo ya yooloka mokati komahangano ngoka.
“Tse kombinga yetu onga oNNFU otwa hala NAU a kale ewi lyaanafaalama na otu na einekelo kutya epagelo otali tukwathele mwaashoka pakutsa omukumo aatiligane ya longele kumwe natse omolwa uuwanawa waanafaalama moNamibia,”Emvula ta ti.
Oshiwike sha piti, aakalelipo yoNAU nayo oya talele po Omupresidende Geingob mEgumbo lyepangelo.
Omaiyuvo gamwe ga hololwa koNNFU okombinga yepato lyuutomeno wepangelo mOshakati noRundu, Emvula okwa popi kutya epato ndyoka lyuutomeno oya dhigupalitha onkalo yaanafaalama.
Pahapu dhe Meatco okwe ya lombwele kutya uutomeno mboka itawu gandja iiyemo yasha. Emvula okwa popi kutya oya uvako omatompelo gaMeatco ihe onkalo ndjoka otayi etitha ekanitho lyiiyemo kaanafaalama.
NNFU okwa pula epangelo li longithe oonzo dhopashigwana mokupatulula ishewe uutomeno mboka.
“Epungulo ndyoka itali gandja meukililo iiyemo kepangelo ihe oli li eyambulepo lyaanafaalama yopevi nekwatho kaakwashigwana mokukwashilipaleka egamenenepo lyoondya dhaakwashigwana nekondjitho lyoluhepo.
Geingob okwa yamukula kutya epangelo ihali tala unene konkalo yiiyemo ihe okuuwanawa woshigwana. Omuleli okwa gwedha po kutya epangelo omathimbo gamwe otali ka ninga omatokolo ngoka itaga vulu okuningwa koongeshefa dhopaumwene.
Ominista yUunamapya, Omeya nIihwa, John Mutorwa, okwa popi kutya Meatco okwa li ta longele muutomeno mboka metsokumwe ndyoka a ningi nepangelo ihe okondalaka ndjoka oya pu ongushu muMaalitsa naMeatco ina holola ohokwe yokulelepeka etsokumwe ndyoka.
“Shika hasho sha etitha epato lyuutomeno ihe omukithi gwekondo nelaka ngoka gwa li gwa tukuka mOnooli ihe sho omukithi ngoka gwa hulu niilonga oyi na okutameka,” Mutorwa ta ti.
Okwa popi kutya epangelo olya tseyitha eningo lyomaindilo kwaamboka ya hala okulongela muutomeno mboka. Okwa popi kutya Meatco ita pata omayakulo ge mOnooli ihe otaka kala ta gandja omayakulo guutomeno gopakathimbo.
Emvula okwa popi kutya ope na woo ompumbwe yomalanditho giimuna kaanafaalama yomOnooli na okwa pula iiputudhilo yepangelo ngaashi omihandjo, iipangelo nodholongo yi kale hayi landa okuza kaanafaalama yomOnooli.
Omuprima gwoshilongo Saara Kuugongelwa-Amadhila okwa popi kutya otaku tulwa miilonga ompango ndjoka tayi utha opo ku kale taku longithwa iilongomwa yomoshilongo. Okwa popi kutya aanafaalama naya iyunganeke opo ya vue okulongitha uutomeno mboka.
Omupeha Omuprima na okuli Ominista yOmakwatathano goPashigwana, Netumbo Nandi-Ndaitwah okwa popi kutya Geingob, okwe mu pa elombwelo opo a ye mekwatathano noombushe miilonga yaSouth Afrika opo ya kundathene kombinga yoondjindikila dheeto moshilongo iimuna.
ELLANIE SMIT