Omutumba gwotango gwokomumvo gwelelo lyoSwapo ogwa holola omaiyuvo kombinga yonkalo yeyo pombanda lyoondando moshilongo.
Shoka osha popiwa kuamushanga-ndjai gwongundu ndjoka Nangolo Mbumba.
Shoka osha holola konima yiiwike sho oshifokundaneki shoNamibia Sun sha lopota e yo pombanda lyoondando dhoka kwa tegelelwa dhi ye pombanda momwedhi nguka, shoNamib Mills kwa tegelelwa natango a tseyithe egwedhelo lyoondando.
E yo pombanda ndyoka okwa tegelelwa li ye miilonga momasiku 23, konima owala sho oNamib Mills a li a tseyitha e yo pombanda lyuusila wepungu, uusila woomboloto, uusila womahangu, olwishi nosuuka momasiku 25 gaJanuari.
“Omutumba gwoSwapo ogwa pula opo omahangano niiputudhilo kayi kale owala tayi lalakanene iiyemo ihe naya tale woo konkalo yaakwashigwana oshowo omauwanawa guulethimbo gookastoma dhawo noshigwana ashihe uuna taya tula miilonga oondando,” Mbumba ta ti.
Okwa gwedha po kutya onkalo yombepo ndjoka tayi lunduluka otayi etitha shi kale oshidhigu epangelo li vule okumona oondya dhoshikukuta dhaakwashigwana.
“Elelo lyetu natango olya holola omaiyuvo kombinga yonkalo yombepo miilongo yoSADC. Onkalo ndjoka oya ningitha oshidhigu epangelo li vule okulanda iikulya yoshikukuta okuza pondje yoshilongo,” Mbumba ta ti.
Mbumba okwa popi woo kutya Omupresidende Hage Geingob okwa popi kombinga yoolopota dhili miikundaneki dhoka dha nuninwa okukuna oombuto dhokukala pwaahena uukumwe neinekelathano mokati kaaleli niilyo yoSwapo. Mbumba okwa popi woo kutya omutumba ngoka ogwa kundathana kombinga yOmutumba gwOmilandu dhoSwapo ngoka kwa tegelelwa gu ningwe metata etiyali lyomvula yo-2016.
Omolwa omutumba ngoka kwa tegelewa gu ningwe elelo lyongundu olya pula okomitiye yoSwapo Party Think Tank yi manithe oombapila dhoka tadhi ka longithwa mOmutumba ngoka.
Amushanga-ndjai okwa popi woo kutya elelo olya pandula e yo komeho ndyoka lya ningwa metotepo lyoskola yOngundu yoSwapo. Okwa ti oompangela odhili pokumanithwa opo oskola ndjoka yi tulwe miilonga nuumvo
“Elelo olya pandula woo e yo komeho ndyoka lya ningwa metulo miilonga lyomusindalandu tagu ithanwa Swapo Party database management system, omusindalandu ngoka nago kwa tegelelwa guye miilonga nuumvo.
ELVIS MURARANGANDA