Iimuna mbyoka ya ethwa yi nape yaana aalithi otayi eta evundakano mOshikandjo shaUukwanambwa mOndonga mOshitopolwa shaShikoto.
Iimuna mbyoka okwa lopotwa tayi yonagula omapya gaakwashigwana na oya etitha ongeyo mokati kaanamapya.
Omukomeho gwoshikandjo shoka, Wilhelm Lidker, okwa popi kutya aakwashigwana kaya uvitile ombili onkalo ndjoka.
“Onda mona omanyenyeto ogendji na onkalo ndjoka onde yi mona ngame mwene nena [mEtiyali]. Onda li tandi hingi okuza kOmuthiya sho nda mono iikombo tayi li epya kakushi kokule nopate. Onda thikama opo ndi keyi hingemo mepya ndyoka.
Okwa holola kutya onkalo ndjoka yokwaahena ko nasha mokati kaaniimuna yamwe po kayi shi ombwaanawa, naaniimuna oya pumbwa okukala taya litha iimuna yawo.
“Aantu oye shi shi kutya iimuna mbyoka otayi vulu okuhanagulapo omapya gaantu ihe kaye na ko nasha. Onda kala nokupopya kombinga yoshikumungu shoka omathimbo nomathimbo ihe osha fa kutya omapopyo gandje otaga gwile momakutsi ga thika,” Lidker ta ti.
Nonando ongaaka natango, Lidker okwa gandja uusama kaantu mboka haya dhigi omapya gawo inaga keelelwa kutya oya puka ngaashi owala mboka ihaya litha iimuna yawo.
Sho aakwashigwana yamwe po ya tula oodhalate komapya gawo, aakwashigwana yamwe itaya vulu okulanda oodhalate nomapya gawo kage li momakowe niimuna ohayi hanagulapo omapya gawo.
ONamibian Sun oya yi moonkundathana nomukalimo gwomOkatope ngoka a popi kutya edhina lye oNangula.
Nangula okwa adhika ta hingi iimuna okuza mepya lyamushiinda gwe, okwa popi kutya shoka oshikando oshititatu esiku ndyoka ta hingimo iikombo mbyoka.
Okwa popi kutya mwene gwepya omukokele ngoka hazi owala megumbo nuunona uwali uushona, okanona kamwe ohaka yi koskola omanga okakwawo haka yi nomukulupe kOkatope hoka haka landitha iiyimati, pahokololo lyaNangula.
PLACIDO HILUKILWA