Omutumba gwiikundaneki ngoka gwa ningwa kaanambelelwa aanene yehangano lyaaniilonga ndyoka tali kwa takanithwa nOngundu yoSwapo lyoNational Union of Namibian Workers (NUNW) mOmaandaha okwa popiwa kutya kagu li pampango molwaashoka omupresidende gwongundu pamwe naapeha ye yaali inaya tseyithilwa.
Amushanga-Ndjai gwoNUNW Job Muniaro okwa nyana epangelo omolwa osheetwapo shiifuta yiishoshela ya gwedhwapo yosolodarity tax, okushunitha pevi oomvula dhokuya moshipundi shevululuko oshowo oompangela aniwa dhokulanditha po oshikunino shiinamwenyo shaEtosha National Park.
Konima owala yomutumba ngoka, aanambelewa yamwe yehangano ndyoka oya dhengele oNamibian Sun taya popi kutya inaya tseyithilwa kombinga yomutumba ngoka.
"Otwa yakula omikanda kutya NUNW otaka kala nomutumba gwiikundnaeki kombinga yoshikumungu she shunitho pevi lyoomvula dhokuya moshipundi shevululuko maaniilonga yepangelo. Omukanda ngoka ogwa popi kutya aanambelewa ayehe yoNUNW naya kale momutumba ngoka," omunambelelwa gumwe ta ti.
Pampango yehangano ndyoka,amushanga-ndjai okwa pumbwa okugandja omukanda gwopambelewa melongelokumwe nomupresidende gwehangano oshowo aapeha ye yaali.
Ihe sho a ningilwa omapulaapulo, omupresidende gwoNUNW Ismael Kasuto okwa yamukula kutya:"Ngame kandi na shoka ndi shi kombinga yomukanda ngoka indeni mu ka pule na ku gu shanga ngoka e gu mupe."
Omupeha presidende gwotango gwehangano ndyoka, Albert Liswaniso okwa yamukula patumwalaka lyopangodhi kutya" Ndjoka onkundathana kungame ; Opo owala tandi shi uvu lyotango. Ahowe inandi tseyithilwa kombinga yomutumba ngoka gwiikundaneki."
Omupeha presidende omutiyali Phillip Munenguni, naye okwa popi kutya ina tseyithilwa kombinga yomutumba ngoka.
Muniaro ina vula okumonika konima yomutumba.
Oonzo dhimwe odha popi kutya ope na omananathano meni lyelelo lyehangano ndyoka na otaku fofodholwa kutya ope na oompangela dhokuya moshipala opo ngoka ta longo pehala lyomupresidende gwoSwapo Hage Geingob ka hogololwe onga omupresidende gongundu pethimbo lyomutumba gwomahogololo gwongundu ngoka tagu ningwa momvula twa taalela.
Geingob okwa tameke ta longo pehala lyomupresidende gwoSwapo, sho omupresidende nale Hifikepunye Pohamba a yi moshipundi shevululuko kuyele omvula ya piti.
Ngele shoka sha longekidhwa osha ningwa, nena Geingob itaka vula okuhogololwa moshikako oshitiyali onga omupresidende gwoshilongo.
"Elalakano lyawo okunyana kehe shimwe shoka tashi ningwa kepangelo lyomupresidende opo aaniilonga ya mone ethano ewinayi yo ya kale inaya hogolola omupresidende Geingob momahogololo ngoka taga landula," onzo yimwe ya popi.
Omahangano ogendji omakalelipo gaaniilonga ngoka ga kwatakanithwa nehangano ndyoka ngoka ga popiwa nago koNamibian Sun oga tindi okunanenwa momalugodhi noomananathano ngoka.
Momukanda gwiikundnaeki ngoka ashanga mOmaandaha ,Muniaro okwa popi kutya omahangano gaaniilonga inaga yiwa nago moonkundathana sho kwa ningwa oompangela dhokutula miilonga iifuta mbyoka yosolidarity tax.
"Epangelo inali yalula aaniilonga onkene inali mona ompumbwe yokuya moonkundathana tango naaniilonga mboka oyo aafuti yiishoshela mbyoka," Muniaro ta lombwele aatoolinkundana.
Okwa gunu kutya omahangano otashi vulika ga gwedhele oondando dhiinima nokugwedhela kiifuta mbyoka.
"Aaniilonga oyo taya ka futa iishoshela mbyoka, onkene etulo miilonga lyiishoshela mbyoka ota li ka thiminika aaniilonga ya pule egwedhelo lyoondjambi," Muniaro ta popi.
Okwa popi kutya oonkalo dholudhi ndyoka otadhi vulu okweetitha omahololomadhilaadhilo okuza kaaniilonga.
"Onkalo ndjoka otayi vulu okweetitha omahangano ga pate; yo aaniilonga taya kanitha iilonga."
Okwa popi woo kombinga yeshunitho pevi lyoomvula dhokuya moshipundi shevululuko okuza po-60 okuya po-50 no 50. Okwa ti ehangano ekalelipo lyaaniilonga inali tseyithilwa.
"Epangelo olya hala okushunitha pevi omuyalu gwiimaliwa hali longitha mokufuta oondjambi paku kutha aanyasha miilonga omanga aakokele mopolitika taya hupithwa, olye ta popile edhilaadhilo ndyoka?"
Muniaro okwa pula epangelo li ye moonkundathana naakuthimbinga ayehe mboka taya ka gumwa komatokolo ngoka tali ningi.
Okwa pula kutya oshike oshikunino shiinamwenyo shaEtosha National Park tashi landithwa po, na okwa okwa popi kutya okwa uva kutya ope na ngoka ahala okulanda po oshikunino.
Muniaro okwa tindi okugandja uuyelele na okwa ti aatoolinkundana naya ninge omakonaakono yoyene.
Okwa pula epangelo li kale nuumwene woopresenda 50 moomina ashihe moshilongo opo li vule okuyambulapo iiyemo.
ELVIS MURARANGANDA