Omukomeho gwopolisi yaNamibia, Sebastian Ndeitunga, okwa popi kutya opolisi kayi na uumbangi kutya omolwashike ku na okutulwa miipandeko omuhingi gweloli ndyoka lyiidhenge mumwe nokambesa, moshiponga shoka sha dhipaga aantu 15 mEtitano lya piti.
Omuhingi gweloli ndyoka Junias Kotokeni Kiingala, 34, okwa tulwa miipandeko ongula yOlyomakaya konima sho a lalekwa moshipangelo ihe okwa mangululwa na okwa pewa elombwelo opo a holoke mompangululo yaMangestrata gwaTsumeb mOmaandaha.
"Okwa mangululwa molwaashoka uuyelele mboka wa monikapo inawu holola kutya omolwashike e na okutulwa miipandeko," Ndeitunga ta ti
Kiingala okwa holoka komeho yaMangestrata, Isabela Mutimba, kiipotha o-15 yedhipago lyaashi lyoshiningilawina. Oshipotha osha undulilwa komasiku gaali gaJuni opo a konge omukalelipo gwopaveta na okwa mangululwa kekunkililo.
Komanda gwOpolisi yaShikoto, Komufala Anne-Marie Nainda, okwa yelithile oNamibian Sun, kutya oshike hashi ha shi ningwa po uuna omuntu ta pangulilwa oshipotha shedhipago lyaashi lyoshiningilawina.
Nainda okwa ti, tango ohaku ningwa omakonaakono opo nduno epeko hali longekidhwa nokupewa ompangu.
"Oshiikolelela koshipotha opo nduno tango oha tulwa miipandeko omanga ina mangululwa," komufala ta ti.
Okwa popi kutya omakonaakono otaga tsikile nuuna kwa monika uuyelele mboka tawu vulu okumu tulitha miipandeko nena ota vulu okutulwa miipandeko.
Nonando ongaaka, omutseyinawa gwiikwaveta, Nico Horn okwa popi kutya opolisi oyi na oonkondo dhokumu kalitha miipandeko nokumu mangulula uuna oshipotha oshishona ihe uuna oshipotha oshinene omutamanekwa ita vulu okumangululwa.
"Omuntu ota vulu okumangululwa kekunkililo nokupewa natango ekunkililo mompangu pethimbo taku undulilwa oshipotha she komeho. Kakele ongele pamwe a li nale a pewa ekunkililo pethimbo a longo omuyonena," Horn ta ti.
Lwopokati mpoka opolisi oyiikaleke kokule nomusholondondo ngoka tagu topolwa komapandja gomakwatathano gopainternet tagu holola omadhina goonakuninga iihakanwa yoshiponga shoka.
Chief Inspector Kauna Shikwambi, okwa popi kutya opolisi otayi ka pititha owala omadhina uuna oonakusa ayehe ya dhimbululwa pamakonaakono goDNA.
“Opolisi yaNamibia otayi tseyithile iikundnaeki ayihe oshowo oshigwana shaNamibia kutya omusholondondo ngoka gwomadhina gwa pititha omolwa oshipotha shoka sha holoka mondjila yaOshivelo-Omuthiya nokudhipaga aantu 15 kagu shi oshinakugwanithwa shopolisi yaNamibia," Shikwambi ta ti.
Shikwambi okwa pula aakwanezimo yoonakusa, unene aavali nenge aamwayina opo ya talelepo okila yomidhimba yopolisi mOvenduka ku vule okuningwa omakonaakono.
“Otatu indile oofamili dhi kale dha ngungumana omanga omakonaakono taga ningwa. Opolisi otayi kunkilile woo oshigwana shiikalele kokule nokupititha komapandja gomakwatathano gopainternet omauyelele ngoka inaga kolekwa nenge taga vulu okuuvitha nayi yakwawo," Shikwambi ta ti.
KENYA KAMBOWE