Omulumentu ngoka a mono tango oshiponga shoka sha holoka mondjila yoB1 konima owala yoominute oshona sho sha holoka okwa hokolola kutya oshi li oshiponga oshinyanyalithi noonkondo.
Aantu ya thika po-15 oya hulithila moshiponga shoka sha holoka mondjila yaOshivelo- Omuthiya konima sho eloli lyiidhenge mumwe nokambesa na oya yaka omulilo.
Aantu yatatu oya hupu moshiponga shoka, mwakwatelwa omuhingi gweloli, omufaalelwa omukiintu oshowo omufaalelwa gumwe mokambesa.
Sho a ningwa naye oonkundatha koshifokundaneki shoNamibian Sun, Fillemon Vatilifa okwa popi kutya oshiponga shoka osha thigi ethano ewinayi momadhilaadhilo ge na okwa hala okukutha mo ethano ndyoka.
Vatilifa okwa li ta hingi okuza mOvenduka okuya kOndangwa sho a adha oshiponga shoka.
"Osha li lwopotundi onti-16:00 sho twa zi owala ondalaye yaCasablanca na otwa mono olwithi oluluudhe oshinano shookilometa 3 okuya pu 4 komeho yetu na otwa mono kutya okuna oshiponga oshinene," Vatilifa ta ti.
Okwa popi kutya oshe ya kutha oominute dha thika po-15 opo ya thike pehala lyoshiponga mpoka ya adha okambesa oshowo eloli tayi pi oshowo omidhimba ndatu dha lala pooha dhopate na oya dhilaadhila kutya ngiika pamwe oyo owala ya li aafalelwa mokambesa ihe sho ya mono okatemba kokambesa oya mono kutya aantu oyendji aafalelwa oyeli mokambesa.
"Oshi li ngiika kutya kehe ngoka ali mokambesa okwa hulitha molwaashoka omulilo ogwa li omunene na kape na einekelo kutya omuna omuntu e na omwenyo. Ka pwali ngoka a li e na iitya okutya sha, atuhe otwa li owala tatu puku komutse. Otwa li oshinano shookilometa 100 okuthika hoka tatu yi ihe osha li sha fa tu li ookilometa 1000 naatango kokule. Otwa li owala twa hala tu thike kegumbo," Vatilifa ta ti.
Okwa pula ngele ondjila oyo owala omukalo gomalweendo tagu vulu okulongithwa pethimbo ndika sho aantu oyendji taya kanithile oomwenyo dhawo moondjila.
"Ondi wete kutya otwa pumbwa oompango oompe dhoka tadhi utha opo omitsalo dhi humbatwe komashina molwaashoka ngele okambea okiipumu mumwe nelelo nena shika osho oshizemo, ipula nee andola okali okahauto okashona," omulumentu ngoka ta ti.
Oshiponga shoka osha etitha oompata odhindji komapandja gomakwatathano gopainternet omanga omuleli gwoshilongo a gandja etumwalaka lyomahekeleko omolwa oshiponga shoka.
Omupresidende Hage Geingob okwa popi kutya otashi etitha ohenda nayi noonkondo sho oondjila dhaNamibia dha ninga eyana lyoosa na otadhi tula oomwenyo dhaantu moshiponga kehe esiku.
Omalelo goondjila oshowo aakuthimbinga yamwe oya ningi omutumba gwiikundaneki mOsoondaha mOvenduka, nOminista Alpheus !Naruseb okwa popi kutya oshiponga shoka otashi kumitha noonkondo.
Omukomeho gwOshikondo shOondjila mOpolisi yaNamibia
Ralph Ludwig, okwa popi kutya omuhingi gweloli okwa tulilwamo oshipotha shedhipago lyaashi lyoshiningilawina na okuli mondjeedhililo yaTjiwarongo na okwa li a tegelelwa a holoke mompangu ohela.
Aakiintu yaali mboka ya hupu moshiponga otaya mono epango mOshipangelo shaShomeya naShakati.
Pauyelele wopetameko mboka wa gandjwa kuLudwig, elola lyeloka olya topa sha etitha omuhingi gweloli a nyengwe okupangela oshiyenditho neloli ndyoka olyiidhenge mokambesa hoka kali taka zi komeho, ihe okwa popi kutya uuyelele mboka owa pumbwa okukolekwa.
Okwa popi kutya omutseyinawa gwomakonaakono goDNA, Omundohotola Paul Ludik okwa ningwa naye ekwatathano opo ku ningwe omakonaakono ngoka goDNA nomakonaakono moshiponga otaga tsikile.
omahwahwameko gegameno
Eugene Tendekule gwoNational Road Safety Council (NRSC) okwa popi kutya oku uvite nayi sho Namibia e li shimwe shomiilongo yomuAfrika yi na omaso geli pombanda taga etithwa kiiponga yomoondjila.
Okwa popi kutya ehangano lyawo olya pumbwa iiyemo opo ku ningwa omahwahwameko gegameno lyomoondjila aluhe.
Ludwig okwa gwedha po kutya omuyalu gwiiponga ohagu shuna pevi pethimbo lyomahwahwameko giikonga yomoondjila.
Ngoka ta longo pehala lyOmunambelewa Omukuluntu gwEhangano lyo Motor Vehicle Accident (MVA) Fund, Joelyn Kurz, okwa popi kutya otaya ka kambadhala okugandja ekwatho koofamili dhoonakusa ayehe na okwa gandja woo omahekeleko koonakudhigwapo ayehe.
KENYA KAMBOWE & GORDON JOSEPH