Omunashipundi gwoMFA, Shali kamati okwa popi kutya iimuna yaanafaalaama otayi momno iihuna nayi koshikukuta nonkalo ndjoka oya nayipalithwa koondjindikila dhomainyengo giimuna dhoka dha li dha tulwa miilonga sha landula omukithi gwekondo nelaka ngoka gwa li gwa dhidhilikwa unene miitopolwa yOnooli yoshilongo.
“Iilyo yetu inayi vula okulanditha iimuna yawo na inayi kala niimaliwa nenge iiyemo yasha uule woomwedhi omugoyi onkene inayi vula okulandela iimuna yawo iikulya nenge omiti, oshowo okuyambulapo iikwaniipangitho yawo mbyoka haya longitha moohambo noofaalama dhawo ngaashi oomboola. Iinuma oyindji oya si kenota unene momudhingolongho gUukwangali moKavango West,” Kamati ta ti.
Kamati okwa popi kutya ekuthopo lyoondjindikila dhomukithi gwekondo nelaka oshi li sha kutha aanafaalama uupyakadhi komapepe ihe aanafaalama natango oya taalela uupyakadhi wonkalo yoshikukuta omolwaashoka inaku monika natango omuloka omuwanawa miitopolwa yimwe yOnooli yoshilongo nomaulithilo oga nkundipala.
Okwa popi kutya aanafaalama yomOnooli yoshilongo inaya mona omauwananwa gasha okupitilwa koshiketha sheyambidhidho lyaanafalama shepangelo na inaku ningwa omakonaakono gasha kutalike kutya aanafaalama mboka oya gumwa ngiini konkalo ndjoka, paliko.
Ehangano ndyoka otali pula opo aanafaalama yalyo ya tulululwe meendelelo momahala ngaashi oofaalama dhaNDC, oshowo moMauni, Tsukwe nomidhingoloko dhaKavango West.
OMFA otayi pula woo opo ku patululwe omadiki gatatu guundjolowele wiimuna mOnooli yoshilongo opo uuna omikithi dhiimuna dha dhidhilikwa kombinga ndjoka, onkalo ndjoka kayi gandje uupyakadhi unene kaanafaalama.
Kamati okwa pula woo opo ku tulwe oodhalate dhekondololo lyomainyengo giimuna pokati kaZambezi naKavango East, Kavango West nOshikoto oshowo Omusati noKunene.
“Uuna pe na oodhalate dhoka nena ngele kwa tukuka omukithi pehala limwe nena onkalo ndjoka itayi gumu aanafaalama ayehe ngaashi sha holoka nomukithi gwekondo nelaka ngoka opo owala gwa hulu,” Kamati ta ti. Kamati okwa pula woo epangelo opo li tulepo odhalate pokati kaNamibia naAngola opo ku vule okukondololwa omainyengo giimuna ko ku vule woo okukondololwa nuupu omikithi dhiimuna uuna dha tukuka.
Ehangano ndyoka lyaaniimuna otali pula woo epangelo li yandjakanene ominino dhomeya lyo li tunge oondama dhomeya dhomevi oshowo li pangele nokuyambulapo oomboola dhoka dhili po nale.
“Otwa kundathana nale iikumungu mbyoka nomalelo gomondjila ihe kape na shoka sha ningwa po,” Kamati ta ti.
Okwa li kwa lopotwa kutya omahala gamwe po mOnooli oga dhengwa nale kefundja, naakalimo yamwe po mOshitopolwa shaMusati omahala gawo gokukala oga kungululwapo komeya na oya tulululwa ihe nonando ongaaka iitopolwa oyindji inayi mona natango omuloka tagu shambula naanafaalama otaya longo nuudhigu mokupalutha iimuna yawo oshowo mo ku yi monena omeya.
PLACIDO HILUKILWA