Ngoloneya gwOshitopolwa shaMusati Erick Endjala, okwa popi kutya ondama yaOlushandja oya pumbwa okulongululwa opo ku yandwe efundja.
Endjala okwa popi kutya aantu ya thika po-300 oya tulululwa mOshitopolwa shaMusati nuumvo omolwa efundja.
Ngoloneya okwa lombwele oNamibia Sun kutya, elongululo lyondama ndjoka olyo ashike ekandulepo lyomukundu.
Omapopyo gaEndjala oga landula omapopyo gOmupresidende gwoDTA, McHenry Venaani ngoka apopi kutya epangelo tali ninge oompangela dhokutunga omahala gokupungula omeya unene miitopolwa mbyoka hayi dhengwa koshikukuta.
“Itashi tambuliwako we shoNamibia aluhe hiiyadha monkalo ya faathana kehe omvula, omolwa oshikukuta nomafundja.”
Endjala okwa tsu kumwe naVenaani kutya omafundja gamwe otaga etithwa komapuko ngoka ga ningwa pethimbo kwa tungwa oopate oshowo iikwaniipangitho yimwe mbyoka tayi imbi omeya ga kungululukile moondjila dhomeya.
Nonando okwa lopotwa efundja ndyoka, ngoloneya gwaMusati okwa popi kutya oshitopolwa osha pyakudhukwa nongundu yooindjinia otayi ka tala nkene ku na okuyandwa omeya kaga ngundumane pomahala gomagumbo.
Okwa popi kutya omakwatho ngoka taga ka pumbiwa okuza pondje yoshitopolwa otaga ka indilwa.
“Otatu ka pula omakwatho okuza pondje uuna twa mono kutya onkalo itatu vulu okuyi kondolola, ihe ngashiingeyi onkalo otatu vulu okuyi kondolola.”
Endjala okwa popi kutya aantu 360 oya dhigwa yaahena omagumbo kefundja na oya tulululwa mEtunda mOshikandjohogololo shaNesi moka ye li mootenda dhoka dha gandjwa kEtanga lyEgameno.
Omakwatho gopauntu otaga gandja kEhangano lyOmushigakano Omutiligane.
KENYA KAMBOWE
Category: