Yimwe yomoondoolopa tadhi kokelele noonkondo mOnooli yaNamibia, okwa lopotwa kutya otayi ndopa okulonga oondjila dhawo nokudhi tula pamuthika unene sho oondjila dhoka dha kulupa noonkondo.
Okwa kundanwa kutya ondoolopa yaShakati oyi na oondjila dhuudha omalambo noonkondo naalongithi yoondjila mondoolopa ndjoka taya nyenyeta. Aalongithi yoondjila mOshakati oya popi kutya omalambo ngoka ge li moondjila otaya teya iihauto yawo unene onkalo moka tamu adhika ondjila yaKwame Nkurumah mOshakati West.
Epandaanda ndyoka olimwe lyomomapandaa giipyakidhila ethimbo kehe mOshakati West na oyuuka kOkamba yAakwiita ya pita pOskola yaErundu nombelewa yIinima yOmegumbo.
Aakwashigwana oya nyenyeta kutya otashi uvitha nayi sho Muni gwondoolopa ita longo ondjila ndjoka.
"Shoka kandi uvite ooshoka kutya aanambelewa yelelo lyondoolopa nookansela ohaya longitha ondjila ndjoka onkene omolwashika uuna wuli pehala ndyoka tali ku pula wu yambulepo ondoolopa iho ningi sha koondjila dhoka dha tekapo nayi," omukwashigwana, ngoka e li omuhingi gwotaxi a pula.
Okwa popi kutya omalambo ngoka otaga vulu okweetitha iiponga yomaidhengo mumwe giihauto.
Omukwashigwana gumwe okwa nyenyeta kombinga yoondando dhokupangelitha iiyenditho.
Okwa popi kutya omalambo ngoka otaga etitha uupyakadhi komatayiyela giiyenditho niinima yilwe mwakwatelwa woo oindjina.
Sho a ningilwa omapulaapulo, omupopiliko gwelelo lyondoolopa yaShakati, Jackson Muma okwa popi kutya oye na ontseyo yuupyakadhi mboka.
"Elelo oli shi onkalo ndjoka tamu adhika oondjila dhetu, unene oondjila dhoka dhi na omalambo nelelo olya tula elongo lyoondjila dhoka momusholondondo gwiilonga yawo mbyoka tayi talika tango momukokomoko gwomvula yo-2015-202,"Muma ta ti.
Muma okwa popi kutya oshimaliwa shoomiliyona 22, oshiitulilwa opo shi vule okulonga ondjila yaKwame Nkrumah oshowo epandaanda lya Immanuel Shifidi mo-2015/16.
"Oondjila dhoka odha klukupa noonkondo na uuna we dhi dhitike nena omalambo ngoka otaga galuka owala uuna kwa lokwa."
Sho pula kutya otashi ka kutha ethimbo li thike peni opo ku longwe ondjila ndjoka okwa popi kutya otendela oyi li nomutumba gwootendela moshilongo na ke na uuyelele natango kutya iilonga otayi tameke uunake.
Monena elelo lyaShakati olyiipyakidhidhila nokuthitika omalambo ihe aakwashigwana oya popi kutya shoka itashi kwathele molwaashoka omvula otayi tameke paife na otaku holoka omalambo omape.
Muma okwa popi kutya elelo lyondoolopa oli na oompangela dhoka dha nuninwa okutula oteya nokulonga oondjila adhihe mOshakati yOmuuzilo nOmuuninginino.
Oompangela dhoka odha kwatelamo etamununo lyepandanda lyaMandume Ndemufayo lyoMR 120, meyambidhidhi lyoRoads Authority oshowo okuyambulapo ondjila ndjoka ya piti poGame okuya kOkatana, opo yi kale noondjila mbali.
Muma okwa popi kutya elelo otali tsikile nokulonga oondjila mondoolopa niiyemo mbyoka tali mono po.
KENYA KAMBOWE