Johannes Mostert ,53, mwene gwofaalama yedhina Swartmodder tayi adhika oshinano shookilometa 135 mUumbugantu waTjiwarongo okwa holoka mompangulilo yaMangestrata gwaTjiwarongo mEtine lyoshiwike sha piti.
Oshipotha she osha undulilwa komasiku 29 gaMaalitsa opo a vule okuninga eindilo lyompito yokwiifutilamo modholongo konima sho kiipotha mbyoka ta tamanekelwa nale kwa gwedha oshipotha shuukulo kohi yOmpango yOkulwitha Uukulo.
Mostert okwa taalela woo iipotha yokukala niilwitho niikuti omanga keena omikanda , oshowo elongitho lyiitopitha keena epitikilo. Oshipotha shomuyonena gwomegumbo shoka sha tulilwamo natango omulumentu ngoka komukulukadhi gwe nale otashi kiipwaakenenwa mompangu.
Eindilo lyomboloha ye olya li li na okupulakenwa mompangu mEtine ihe olya undulilwa komeho sho kiipotha ye kwa gwedhelwa ishewe.
Omufali gwiihokolola mOmpangu gwepangelo moshipotha shoka Lewis Chigunwe okwa popi kutya omolwa onkalo yiipotha mbyoka tayi tamanekelwa omulumentu ngoka nena eindilo lye lyomboloha otali ka pulakenwa owala mompangu yopashitopolwa nenge mOmpangu yoPombanda onkene oshi li momake gwOmupanguli-Ndjai oye a ninge etokolo.
Chigunwe okwa popi kutya sho monena Epangelo tali ungaunga noshipotha shuukulo nena otashi vulika moshipotha shoka muka kale iilongo oyindji.
Omukalelipo gwopaveta gwomutamanekwa, Willem Visser okwa holola kutya omuyakulwa gwe okwa tseyithilwa kombinga yiipotha ya gwedhwa po mbyoka ta tamanekelwa oshowo esiku moka eindilo lye tali ka pulakenwa opo ku gandjwe ompito ya gwana kepangelo li manithe omakonaakono.
Oondjembo oshowo iikuti niinima yilwe oya monika kopolisi sho omukulukadhi nale gwaMosterts a ka lopota kopolisi oshipotha shomuyonena gwomegumbo nopolisi oya yi yi ka hadhe kofaalama yomulumentu ngoka.
Mombelewa yaMosterts omwa adhika iiketha itatu yokupungula muna oondjembo, iikuti oshowo iitopitha yopeke niinima yilwe.
Moseti ye omwa adhika omathano gomidhimba taku tengenekwa kutya oga thanekwa omanga oshilongo inashi manguluka.
Moombuli dhegumbo omwa adhika omizalo dhaakwaita yoPeoples Liberation Army of Namibia, Koevoet noSouth West African Territory Force.
Mondunda yokulala omwa adhika ondjembo yoAK-47 yuudha iikuti. Mostert ota kala mondjeedhililo.
ELLANIE SMIT