Ominista yUundjolowele nOnkalonawa Bernard Haufiku pethimbo a popi megumbo lyomutumba gwopashigwana okwa kunkilile aantu mboka taya yi mOnooli yoshilongo ya kwashilipaleke kutya oyiigamena komukithi ngoka omudhipagi.
Pauyelele mboka wa gandjwa kuHaufiku, omukithi ngoka ogwa dhipaga aantu ya thika po-425, nomaso ogendji oga dhidhilikwa mOshitopolwa shaHangwena nOshana.
Haufiku okwa popi kutya omukithi ngoka ogwa taandele mUumbugantu waAfrika omimvo dha piti naNamibia okwa dhidhilike uupyakadhi wa faathana momvula yo-2013 no2014.
“Okuyeleka nomimvo dha piti, e yo pombanda lyiipotha yomukithi ngoka olya lopotwa mIitopolwa ngaashi Ohangwena, Omusati, Oshana nOshikoto,” Haufiku a lombwele egumbo lyomutumba gwopashigwana.
Okwa popi kutya, uuministeli ohawu pombele omagumbo nokugandja oonete dhoomwe kaakwashigwana yomiitopolwa aihe mbyoka ya gumwa.
Minista okwa popi kutya aantu otaya vulu okwiigamena komukithi ngoka pakulongitha omiti dhokwiigamena opo kaya like koomwe, okuwapaleka omidhingoloko dhomagumbo gawo oshowo okuzala iizalomwa yomaako nomagulu omale.
“Uuministeli owu na omiti dhokukondjitha omalaria odhindji nomandiki agehe ogena omiti dhoka tadhi ka pewa aantu mboka ya kwatwa komukithi ngoka,” Haufiku ta ti.
MERJA IILEKA
Category: