Omupeha -Chancellor gwOshiputudhilo shoUniversiti yaNamibia, Unam, Omuprofessa Lazarus Hangula okwa popi kutya aailongi oya tambulwa opo ya tsikile omailongo gawo moshiputudhilo shoka ihe hayo taya kondolola nokukwatela komeho iilonga yoshiputudhilo.
Hangula okwa popi ngaaka pethimbo kwa patululwa pambelewa iilonga yoshikako shonuumvo miiputudhilo ine yomOnooli yoshilongo, epatululo ndyoka lya ningilwa mOshiputudhilo shaHifikupunye Pohamba mOngwediva.
"Onda hala ndi shi yelithe mpaka nena kutya aailongi oya tambulwa owala opo yiilonge moshiputudhilo shika ihe haku shikondolola, mbyoka iilonga yelelo lyoshiputudhilo," Hangula ta ti.
Etalelepo lyaHangula kiiputudhilo yomOnooli olya halutha aailongi oyendji mboka ya popi kutya omahololomadhilaadhilo ngoka ga ningwa kaailongi omasiku ga piti ogo ga thiminike Hangula a talelepo iiputudhilo mbyoka.
"Onda lombwelwa kutya etalelepo lyomuprofesa ngoka lya hugunina miiputudhilo mbika osha li momvula yo-2004. Ondi wete kutya okwe ya huka omolwa omahololomadhilaadhilo ngoka ga ningwa kaailongi ngaashi ngoka ganingwa kaailongi yokOvenduka," omwiilongi gumwe ta ti.
Eyelitho lyopambelewa kombinga yetalelepo lyaHangula, olya popi kutya ope na omulandu ngoka hagu utha kutya otaka gandja iipopiwa ye peni.
Pethimbo lyoshipopiwa she, Hangula okwa popi kutya Unam ika keetha ina geela mboka taya yono nokutaagulula oompango.
"Nashi kale sha yelela aailongi ayehe niilyo yoSRC kutya ayehe mboka inaya hala okulandula omilandu dhaUnam, oshiputudhilo itashi ka ndopa okugwanithapo omilandu dhasho."
Hangula okwa popi kutya aailongi mboka ya patele yakwawo pondje otaya ka tidhwa mo moshiputudhilo.
"Natango otandi kunkilile aailongi oshowo kehe ongundu yaailongi ndjoka tayi ka patela pondje aailongi mboka ya hala okiilonga kutya otaya ka tidhwa," Hangula a kunkilile.
Omunambelewa ngoka omukuluntu gwaUnam okwa popi kutya aailongi inaya landula omikalo dhaailongi yaSouth Afrika mboka ya pata omiyelo dhiiputudhilo no kutomeka omililo.
Hangula okwa popi kutya aailongi inaya landula omalombwelo gwomunapolotoka gwaSouth Afrika, Julius Malema.
"Ope na aantu mboka ye li moshilongo muka ye wete kutya uuna Juju [Malema] a lombwele aailongi yaSouth Afrika ya ninge omakanka, AaNamibia nayo naya ninge ngaaka."
Hangula okwa popi kutya aailongi inaya itaala oohapu dhaamboka taya popi kutya iifuta yokwiishangitha oya kuthwa po, ihe etsokumwe oli li kutya aailongi ayehe naya pitikwe yiishangithe kutya oye na iifuta nenge kaye na iifuta , niifuta mbyoka okwa tegelelwa yi kale ya futwa okuya muJuli.
Miitya ye yahugunina, Hangula okwa lombwele aailongi kutya inaya pukithwa yo naya dhimbuluke kutya otaya vulu okutidhwa mo moshiputudhilo uuna taya yi pondje omilandu, naashoka otashi ke ya ningila oshidhigu opo ya tambulwe kiiputudhilo yilwe.
KENYA KAMBOWE
Category: