Omupresidende Hage Geingob okwa tsu omukumo aakumbinga momutumba gwopashigwana opo ya patathane ngene okwa pumbiwa tuu okutungwa opaliamende ompe na okwa popi kutya ye iikaha ye oya mangwa na ita vulu okwiidhopa metokolo ndyoka lya ningwa kaatotiveta.
Opaliamende ndjoka taku popiwa tayi tungwa otayi ka pula aakwashigwana iimaliwa ya thika poomiliyona 700.
Omuleli gwaNamibia okwa popi ngaaka pethimbo kwa patululwa omutumba omutitatu gwopaliamende ontihamano, na okwa ti okwa yakula omatumwalaka ogendji okuza kaantu taya pula opo a kalekwe etungo lyopaliamende ompe.
Omuleli okwa popi kutya ye ita vulu okwiidhopa moshikumungu shoka omolwa omayooloko giilonga noonkondo dhoka e na na okwa popi kutya omaindilo gokukaleka oompangela dhoka naga ukithwe komupopi megumbo lyopashigwana ngoka ta kwatele komeho iilyo yopaliamende.
Epatululo ndyoka lya ningwa mEtiyali olya ningilwa moshikunino shopaliamende moka mwa dhikwa otenda onene opo mu vule okukala iilyo ayihe yomagumbo gopashigwana gaali oshowo aayenda omathele mboka ya hiwa.
Aakwashigwana oyendji oya nyana oompangela dhokutunga opaliamedne ompe taya popi kutya kashi shi oshinima shopaulumomhumbwe pethimbo ndika.
Geingob omasiku ngeyaka okwa kaleke etamekitho lyiilonga yokutunga nokuwapaleka okapale kOmatukodhila goPaigwana kaHosea Kuutako omolwa okwaahena uuyuki kwa longwa megandjo lyotendela yokulonga okapale hoka. Elongo lyokapale hoka olya li tali pula oshimaliwa sha thika poobiliyona 7.
Omunongononi gwopolotika Nico Horn okwa popi kutya kape na epangelo tali kalongitha oomiliyona 700 mokutunga sha ihe itamu idhopiwa kongundu tayi pangele moka omupresidende e li oshilyo nomunashipundi gwiikondo yimwe.
“Omatokolo goludhi ndoka itaga vulu okuningwa pwaahena eidhopomo lyomupresidende. Epangelo olya pumbwa okukutha po iinakugwanithwa pehala lyokwiikaleka kokule,” Horn ta ti.
“Eeno, otuna omalutu goonkondo ga yooloka nokupopya kutya shoka oshi li oshinakugwanithwa shaatoteveta oshi li mondjila inashi puka, ihe omupresidende okuli omuleli gwongundu tayi pangele oshilongo nonando iha kutha ombinga miilonga yakehe esiku yopaliamende.”
Moonkundathana dhoka a li aningwa nadho kuyele koshifokundaneki shoNamibian Sun,
omupopi momutumba gwopashigwana Peter Katjavivi, okwa koleke oompangela dhokutunga opaliamedne ompe. Okwa popi kutya omatungo ngoka haga longithwa monena oga ninga omashona okuyeleka nomuyalu gwiilyo yopaliamende monena.
Shoka osha landula etalululo lyekotampango, moka omuyalu gwiilyo yopaliamende gwagwedhelwa okuza piilyo 72 okuya piilyo 104, sho omupresidende a pewa oonkondo dhokuhogololwa iilyo yagwedhwapo ya thika pu-8 omanga nonakuziwa a kala ha hogolola owala iilyo 6.
Omuyalu gwiilyo yoNational Council nago ogwa londo pombanda okuya piilyo 42 okuza kiilyo 26.
Hugunina Geingob okwa kumike oshigwana kutya epangelo inali mbangolota nonando okwa holoka omifofodholo kutya epangelo olya talela ompumbwe yoshimaliwa. Omuleli natango okwa endulula oompangela dhelelo lye dhoka dha nuninwa okukondjitha oluhepo, omayambulepo guuyuuki nokutunga omagumbo gaNamibia
ELVIS MURARANGANDA