Sho a monika okankera yokomagundji, omukiintu ngoka okwa li e wete kutya eso lye olya thika ihe konima yomimvo 7 monena omukiintu ngoka okuli momwenyo na ke na we okankera.
Omanga ina monika okankera, Hedwig Hoveka ngoka a li ha longo mehangano lyokuwapaleka okwa kala e na oshitumba kegundji shoka a li e wete kutya oshinima owala.
Sho okwaako kwe kwa tameke taku ehama okwa dhilaadhila kutya ngiika oha longo owala unene na oha umbata iinima iidhigu.
“Onda kala ngaa tandi shi ipula sho sha taandele komagundji gandje ihe onda yi owala ndi ka mone ndokotola konima sho uuwehame wa kala unene,” Hoveka ta ti.
Okwa ningilwa omakonaakono gokumona uupyakadhi we nokonima yomakonaakono okwa monika kutya oshitumba shoka oshokankera na okwa tulwa kepango.
“Osha holoka meendelelo na osha li oshidhigu noonkondo kungame. Omagundji goye ogafa eliko lyoye , ipula nee kutya ogena okutetwako,” Hoveka ta popi, omanga ta kwata ontulo ye.
“Onda kala nokwiipula kutya otandi ka kala ngaa we omukiintu ngaashi nale. Atuhe otushi shi kutya aalumentu kaye hole iinima ya yonuka na osho aluhe nda kala nokudhilaadhila,” Hoveka a popi ngaaka ta yolo.
“Onda kala aluhe nokudhilaadhila eso, ihe nonando onda li nda tila ondiilongekidhile okusa.”
Okwa popi kutya yina nayinagona gumwe oya si kokankera onkene okwa li e wete kutya naye otasi ihe ye okwa hupu.
“Omafufu gandje gokomutse oga guko. Pethimbo ndyoka onda li handi longo peshina nuuna nda dhimbwa okuzala uutenda wandje womomakusti aantu oyali haya kundundje taya ti tate.”
Epango olyemukutha oonkondo nayi na okwa kala aluhe ha fudha po omasiku gatatu kehe oshiwike opo a tye po hwepo.
Okwa popi kutya okwa kala ha kungu ombinzi molwaashoka kali hali okwa kala a tila okulya molwaashoka uuna a li ohashi mu ningi nayi.
Okwa tsikile kutya okwa kala a hala owala okukala pevi ina hala okulala kombete nenge okukala a kuutumba koshipundi.
Okwa popi kutya sigo okesiku ndika oha tila epango lyochemotherapy.
“Epango ndyoka hali ithanwa radiation olya li ehwepo ihe ohali ningithandje ndi kothe uule woowili odhindji onkene ofamili yandje oyali ya tila kutya pamwe esiku limwe itandi ka penduka we.”
Aakwanezimo ye mboka inaya hokolola uuvu we ya manguluka oya li ye wete kutya ita hupu.
“Uuna ye ya okutalelandje po ohaya kala taya lili ihe ngame kandi shi hole.Onda lombwele woo omumwandje gwomumati kutya uuna ta lili ota ningithandje ndi kale kandi na oonkondo onkene onda pula a kale e na omukumo,” Hoveka ta ti.
Hoveka monena okwa kala uule woomvula ntano ke na okankera ihe ohayi aluhe komakonaakono.
JEMIMA BEUKES