Omulumentu gwoomvula 45, ngoka e li mwene gwolukalwa lwaOerwoud moTsintsabis mOshitopolwa shaShikoto, okwa tulwa miipandeko kopolisi na okwa holoka komeho gompangu yamangetrata mOshomeya ta pangululwa oshipotha shekwatonkonga.
Otaku hokololwa kutya Ncame Mishe, okwa yi miihulo nokanona kokakadhona dhoomvula 13, konima sho e ka pe iikolitha. Nakuninga oshihakanwa omunaskola gwondondo onti-5 moskola yomomudhingoloko ngoka.
Oshipotha shoka osha undulilwa komasiku 19 gaMei nomutamanekwa ota kala modholongo.
Oshiningwanima shoka osha holoka mEtiyali lyoshiwike sha piti.
Kwiikwatelelwa kOmukwatakanithi gwIimbuluma mOshikoto, Naomi Katjiua, opolisi otayi konaakona woo oshipotha sheikuthomwenyo, sho omukalimo gwomomukunda Othimbika momudhingoloko gwaNyuulaye, Martin Shafa 22 a adhika i imangelekela mondunda ye yokulala omutenya gwEtine lya piti.
“Nakusa ina thigapo ombapila yasha ndjoka tayi popi andola kutya oshike iikuthile omwenyo,” Katjiua ta ti.
Opolisi mOshitopolwa shaMusati otayi konaakona oshipotha sheso lyomeya sho omudhimba gwaAbsalom Aludhilu Taapopi gwoomvula 45 gwa adhika momeya mokanala keli pokati kOshikuku nOshakati ongula yEtine.
Kwiikwatelelwa kuWarrant Lineekela Sgikongo nakusa ngoka omukalimo gwomomukunda Oshuungu , okwa li a monika lwa hugunina puukefe wopOmulondo ongulohi yEtitatu.
Nakusa okwa dhigi po ookume ke puukefe opo a ye kegumbo lwopotundi 20:00.
Sho ina shuna kegumbo ofamili ye oya piti ongula tayi mu kongo na oya adha olutu lwe mokanala.
Omudhimba gwe ogwa fala kokila yopolisi mOshakati hoka tagu ka ningilwa omakonaakono goshiyetithi sheso.
PLACIDO HILUKILWA