Aalongi oshowo aanaskola moskola yopaumwene mondoolopa yaEenhana ndjoka opo owala ya patulula omiyelo mOshitopolwa shaHangwena oya taalela onakuyiwa inayi tengenekwa sho Uuministeli wElongo wa gandja elombwelo opo oskola ndjoka yi pate omiyelo.
Amushanga ta kalele mUuminsiteli wElongo, Sanet Steenkamp okwa gandja elombwelo opo ku edhilwe meendelelo oskola yedhina Saint Michael English Private School molwaashoka aniwa oya patulula omanga inayi pewa omulilo omuzizi kuuministeli.
Oskola ndjoka oya Dineinge Sheya, omukuluntuskola nale moskola yaHaimbili Haufiku Senior Secondary School.
Oskola ndjoka sho ya tameke muJanuari nuumvo oyi na aanaskola 90 mondondo dhopetameko sigo ondondo onti-6 na oyi na aalongiskola ya8 oshowo amushanga naawapaleki yaali.
Mombapila ndjoka ya shangwa momasiku gaali gomwedhi Februali, Steenkamp okwa tseyithile Sheya kutya okwa ningwa etokolo kelelo lyoshikondo
shoNational Examinations, Assessment and Certification kutya ooskola adhihe dhopaumwene dhoka tadhi longo omanga inadhi pewa epitikilo kuuministeli nadhi edhile meendelelo.
“ Onkene mpaka otatu ku tseyithile opo wiiyuthe kelombwelo ndika li li mombapila ndjika.”
Sheya okwa pewa omayele opo a ninge ekwatathano nomukomeho gwelongo moshitopolwa opo aanaskola mboka ya gumwa ya wape okumonenwa omahala kooskola dhilwe na okwa pewa elombwelo opo a shunithe iimaliwa ayihe mbyoka ya futwa kaavali.
Sheya okwa popi kutya oskola oya gwile muupyakadhi omolwa epuko lya ningwa sho a kutu miilonga aalongi naanaskola oya shangithwa ihe oya gandja owala eindilo lyawo konima.
“Otwa taalela onkalo ndjoka na otandi ka ithana oshigongi shaavali opo ndi ya lombwele kombinga yonkalo ndjika yi li po,” Sheya ta ti.
Sheya okwa popi kutya ina kala a tegelela uupyakadhi wa sha molwaashoka okwa li owala e wete kutya oskola otayi vulu okutameka omanga ya tegelela eyamukulo okuza kuuministeli.
“Ngele iinima ayihe oya pwa kandi wete kutya omolwashike tu na okukaleka ootundi sigo oko-2017. Omatungo niikwathitholongo ayihe oyi li pamuthika. Aalongi mboka ndina oya pyokoka
na kandi wete uupyakadhi wa sha andola okutameka ootundi omanga twa tegelela eziminino. Aantu ayehe osho haya ningi.”
Okwa popi kutya oskola oya taambiwako nawa koshigwana na oya mono omaindilo ga thika po-271 ihe oya vulu owala okutambula aanona ya thika po-90 molwaashoka etungo lyoongulu dhimwe inali manithwa natango.
Okwa popi kutya ompangela dhetungo lyawo odha ziminwa kelelo lyondoolopa yawo omvula ya piti niilonga oya tameke meendelelo moka kwa tungwa oongulu 9, oshowo oshinyanga shiigongi nombelewa.
Sheya okwa popi kutya omadhilaadhilo goskola yopaumwene oge ya sho aakwashigwana yamwe ye mu pula opo a tsikile nokukwathela oshigwana momukalo kehe ngoka ta vu konima sho a yi moshipundi shevululuko.
Sheya okuli omundungiki a simanekwa koyendji ngoka oshikako shoka a kala moHaimbili Haufiku sha simanekitha oskola omolwa iizemo iiwanawa mbyoka ya likolwa koskola ndjoka muule womimvo dha piti.
PLACIDO HILUKILWA