Johannes okwa valelwa mEengodi mOshitopolwa shaShikoto nuuvu tawu ithanwa Tetra-amelia syndrome mboka hawu etitha opo omaako nomagulu ka ga koke pamwe nolutu.
Oya valwa yeli omugoyi ihe yamwayina kaye na uupyakadhi mboka.
Sho e na oomvula hamano, Johannes ota vulu nale okushanga oombapila a kwatitha opena noohulo dhomapepe ge.
Yina, Hilima Jeremiah, okwa popi kutya nonando okanona ke oka valwa nuulema, oke na omagano na oka hala ka kaninge omulongiskola.
"Uupyakadhi mboka e na okukala owala keena omaako nomagulu ihe okuna omagano noonkondo. Omunambili na oha dhana owala megumbo ta nhuka ngaashi uunona uukwawo. Ngaka omagano lela," Jeremiah ta ti.
Johannes ngoka a tameke okinda omvula ndjika okwa tseyika nawa kaanona yakwawo oshowo omulongi gwawo.
"Aanona koskola oye mu taambako nawa na iha hindwa. Okuhole oskola noonkondo na aluhe oha kala ta nyenyeta uuna nda yi ndi ke mu taleko molwaashoka oha kala a hala okukalako ethimbo," Jeremiah ta ti.
Jeremiah, ngoka iha longo okwa popi kutya oha ya hupu owala miiyemo yooN$200 mbyoka hayi pewa Johannes kehe omwedhi okuza kepangelo.
"He ihe mu kwatha sha. Onda hala okulonga ihe itandi vulu okumona iilonga. Ohandi mu kwathele owala niimaliwa mbyoka hatu mono kepangelo."
Omudhindoli gwoshifo shoElegance magazine, May Hikumwah, ngoka a mono ompito yokutsakanena naJohannes okwa popi kutya okanona hoka oke na omukumo.
Hikumwah tango okwa uvu ehokololo lyaJohannes komukalelipo gwoNantu, George Hafilwa ngoka a pula opo okanona ka monenwe omakwatho omolwa onkalo moka keli.
"Inandi hala okuya komahangano molwaashoka ohaga pula olule onkene ondayi kaantu oohandimwe. Aantu oya gandja omakwatho ngaashi okatemba oshowo iinima yilwe," Hikumwah ta ti.
Konima sho a tsakanene nofamili yaJohannes, Hikumwah okwa popi kutya okwa tsuwa omukumo noonkondo opo a kwathele okanona hoka.
Hikumwah okwapopi kutya ofamili ndjoka oya pumbwa omakwatho noonkondo.
MERJA IILEKA