Ominista nale yokabinete kaNamibia otayi pulwa pamwe nopolisi opo ya gandje omayamukulo nuuyelele omolwa ekano lyomuniilonga mohambo yaminista ngoka, omuniilonga ngoka a kana muAguste gwomvula ya piti.
Aakwanezimo yomulumentu ngoka a kana muAguste gwomvula ya piti, okuza kohambo yominista nale Joel Kaapanda mOnamatanga mOshitopolwa shaMusati onkene taya pula omayamukulo okuza kuKaapanda oshowo kopolisi.
Aakonaakoni yopolisi oya a dha omasipa gomuntu momudhingoloko ngoka, ihe inaku kolekwa natango ngele ogomulumentu ngoka taku popiwa a kana.
"Okukala wa tegelela omayamukulo otashi teya omutima noonkondo na itandi shi vulu we," Elizabeth Petrus, yina ya Phillip Nande Julius ta ti.
Julius okwa kana konima owala yesiku limwe sho a thiki mohambo yaKaapanda na otaku popiwa a dhengele omugandji gwe gwiilonga (Kaapanda) ongodhi lyopotundi 22:00 ta popi kutya ope na aantu yeli mohambo taye mu ningile omatilitho geso.
Oonkundathana dhe dhopangodhi nomugandji gwe gwiilonga odha tetulwa naJulius ina monika we nenge uuvike ngaa kutya okuli peni okuza kesiku ndyoka.
Aakwanezimo oya popi kutya oya uvu etumwalaka moradio yOshiwambo yaNBC momasiku ga 4 gaAguste na oya kwatathana naKaapanda meendelelo ngoka e ya lombwele kutya okwa lopotela opolisi yaKahao kombinga yekano lyaJulius ihe Petrus ina pandula omukalo ngoka taku ungaungiwa nago oshipotha shoka.
Sho a kala ta pula kutya omonamati gwosheeli okwa kana monkalo yatya ngiini okwa kala ta tumwa okuza komunambelewa gumwe okuya komunambelewa omukwawo naapolisi inaya hala okumupa uuyelele nenge omayamukulo.
Opolisi yaKahao oye mu lombwele kutya inaku lopotwa omuntu a kana ihe opolisi oya ka lundulula omayamukulo gawo konima sho a tindi okuza po.
Sho kwiitsuwa omasipa gomuntu momudhingoloko ngoka muKotomba gwomvula ya piti, aakwanezimo oyali yiithanwa kopolisi na oya lombwelwa kutya okwiitsuwa omasipa gomuntu na otaku ningwa omakonaakono ku talike ngele ngoka omasipa gaJulius nenge ogomuntu gumwe.
Oya li ya uvanekelwa kutya iizemo otayi ya muule wiiwike itatu.
"Konima yiiwike itatu onde ya pula ihe onda lombwelwa kutya otayi kutha oomwedhi ndatu. Konima yomwedhi ndatu sho nda ka pula aapolisi yomOmusati otaya idhimbikendje owala. Otashi ehameke noonkondo okukala wuna omumoye a kana owala monkalo yili ngaaka ihe nomukalo ngoka opolisi tayi ihumbatelendje otagu lulumike noonkondo," omukiintu ngoka a tsikile.
"Omolwashike itaye tu lombwele owala oshili? Nongele ope na shoka sha ningwa naya lombwelendje oshili molwaashoka otwa pyakudhukwa okudhiminapo."
Kaapanda okwa koleke kutya Julius okwa li omuniilonga gwe na okwa holola einekelo kutya omakonaakono golabora otaga pu mbala nokugandja iizemo.
Sho a ningilwa omapulo, omukomeho gwoshikondo shOmauyelele gOshigwana mOpolisi yaNamibia, Omupeha Komufala Edwin Kanguatjivi, okwa ti: “Otatu longo noshipotha shoka."
Okwa gwedha ko kutya okuna omukumo kutya iizemo yolabora otayi pitithwa kuyele.
PLACIDO HILUKILWA